Sonaý balalyq shaǵymyzdyń eń bir qaltarystarynda qalǵan oıyndar keıde quddy bolashaǵymyzdy da baǵdarlap bergendeı bolady da turady. Kózin tyrnap ashqannan dáriger bolyp, ıne shanshyp oınaıtyn zamandastarymyzdyń keıbiri shynynda da ýaqyt óte kele talaılardyń alǵysyna bólengen saýapty mamandyq ıesine aınaldy.
О́mirdiń oıynǵa, oıynnyń taǵdyrǵa áser etetini talas týdyrmas?! Áser etedi demekshi, «Qyz Jibek» fılmi ekranǵa shyqqan kezde aýyldyń balalary Tólegen men Bekejan bolyp oınaıtyny eske túsedi. Bireýi – Tólegen, ekinshisi – Bekejan, ortasynda Jibek bolyp kishkentaı bir qyz shashy jalbyrap, arasha surap júgirip bara jatqan kórinis áli de kóz aldymyzda.
Keshe ǵana aınaldyrǵan 2-3 aqparat kóziniń biri – teledıdarǵa telmirip otyratyn balany kórmeıtin edik. Qalanyń balasy da, dalanyń balasy da qoly qalt etse oıyn oınaıdy. Qarańǵy túsip, qarny ashsa da qyzyqqa toımaı, áke-sheshesi shaqyrǵan soń áreń úıge qaıtatyn sol urpaqqa oıyn túrleri týraly aıtsań, árqaısysy balalyq shaǵyna sapar shegip, tereń oıǵa berilip, qaıtyp oralmaıtyn kúnderdiń saǵynyshyn tolǵaıtyny sózsiz.
Qyzylordalyq tanymal fototilshi Bolat Omarálıevtiń fotoobektıvine ilingen myna nostalgııalyq sýretti kórip otyryp, qııalyńyz talaı qyrdy sharlaıtyny anyq. Sáti kelisken kadrdaǵy oıyn balalary búginde elýdi eńsergen, ıakı qyryqtyń qyrqasyna shyqqan kisiler bolar. Olar araǵa jarty ǵasyrǵa jýyq ýaqyt salyp jarııalanǵan fotodan ózderin tanı ma eken?
– Ár zamannyń óz áni, óz oıyny bar. Biz de bala bolyp kórdik. Er balalar kóbinese atys-shabys oıyndaryna beıim. Ul bolǵasyn kóbinese erteli-kesh ermegimiz osy soǵys oıyny bolyp keletin. Munyń bári bir jaǵynan basynan jaýgershilik arylmaǵan halqymyzdyń júrip ótken joly. Sonaý zamandardan beri, odan keıingi ultazattyq soǵysy, azamat soǵysy, Uly Otan soǵysy sol zamannyń balasynyń sanasynda, júreginde qalady. Qazaqstannyń shejiresine de qarasań, soǵystan kóz ashpaǵan. Qudaıǵa shúkir, qazir soǵys oıynyn oınap júrgen bala kórmeısiń.
Al bul fotony shamamen 1975 jyldary túsirsem kerek. Kele jatsam, aýyldyń jaılaýynda qıqý salyp, shaıqasyp jatqan balalardy kórdim. Es bilgeli beri erip kele jatqan tanys kórinis kózime ottaı basyldy. Atoı salyp oınap jatqan balalardyń ishinen ózimdi kórgendeı, ózimdi taýyp alǵandaı sál áserlenip turdym da, men de kók shópke jata ketip, «foto myltyǵymdy» ala salyp, balalarǵa baǵyttap, osy kadrdy «atyp aldym», deıdi tájirıbeli fototilshi.
Aınash ESALI,
«Egemen Qazaqstan»
ALMATY