Bul kúnderi Senat depýtattary qazaqstandyqtarmen kezdesýler ótkizýde.
Oral qalasynda Parlament Senatynyń depýtaty, Qazaqstannyń Bala quqyqtary jónindegi ýákili Sáýle Aıtpaevanyń qatysýymen dóńgelek ústel ótti, dep habarlady Senattyń baspasóz qyzmeti.
Shara barysynda aımaqtaǵy kámeletke tolmaǵandardyń quqyn qorǵaý jáne qamtamasyz etý, balalar arasyndaǵy quqyq buzýshylyqtardyń aldyn alý, densaýlyq saqtaý, sondaı-aq jetim balalar quqyqtarynyń saqtalýy máseleleri qaraldy. Úkimettik emes uıymdardyń ókilderi osy saladaǵy jaǵdaıdy jaqsartý, bilim berý jáne tárbıe mekemeleri júıesin jetildirý, memleket pen qoǵamdy úılestirý jónindegi óz usynystarymen bólisti. О́z kezeginde S.Aıtpaeva olardyń saýaldaryna jaýap berip, elimizdegi Bala quqyqtary jónindegi ýákil ınstıtýtyn damytý men eldegi kámeletke tolmaǵandardyń quqyqtaryn qorǵaýdy qamtamasyz etý týraly áńgimeledi.
Senator, sondaı-aq qalada ótken transshekaralyq sý jónindegi yntymaqtastyq máselelerine arnalǵan halyqaralyq konferensııa jumysyna qatysty. Forýmǵa Parlamenttiń, ortalyq jáne jergilikti bılik organdarynyń, ǵylymı qaýymdastyqtyń, azamattyq qoǵamnyń, Qazaqstan, Reseı, Aýstrııa, О́zbekstan jáne basqa da elderdiń sarapshylar qoǵamdastyǵynyń 130-dan astam ókili jınaldy. Konferensııa barysynda Jaıyq ózeniniń sý resýrstaryn basqarý jónindegi ekijaqty jáne kópjaqty yntymaqtastyqty nyǵaıtý múmkindikteri, sondaı-aq sý resýrstaryn qorǵaý máseleleri boıynsha sheshim qabyldaýdaǵy jurtshylyqtyń róli talqylandy.
***
Senat depýtattary Erbolat Muqaev pen Narıman Tóreǵalıev jumys babyndaǵy saparmen Batys Qazaqstan oblysyndaǵy Jánibek aýdanyna keldi, dep habarlady Senattyń baspasózi qyzmeti.
Olar oblystyq jáne aýdandyq máslıhat depýtattarymen, ardagerlermen, úkimettik emes jáne jastar uıymdarynyń, buqaralyq aqparat quraldarynyń ókilderimen kezdesti. Kezdesýde aýdandyq ardagerler keńesiniń tóraǵasy Amangeldi Ýálıev, aýdan ákiminiń orynbasary Jaqsylyq Abdolov, «Shuǵyla» gazetiniń dırektory-bas redaktory Ahmedııar Batyrhanov, aýdandyq máslıhat depýtaty Berik Yqsanov, eńbek ardageri Samıǵa Qaıyrova, Kásipkerler palatasynyń Batys Qazaqstan oblystyq bólimshesiniń dırektory Jasulan Basyrov sóz alyp, olar aýdandaǵy «Rýhanı jańǵyrý» baǵdarlamasyn iske asyrý barysynan habardar etip, ózge de ózekti máseleler týraly oılaryn ortaǵa saldy. Atap aıtqanda, Jánibek aýdanyndaǵy akademııalyq baqty arnaýly uıym retinde qurý, oblys ortalyǵynan shalǵaıda jatqan Jánibek, Bókeıorda jáne Qaztalov aýdandaryn 2021 jylǵa deıin keńjolaqty ınternetpen qamtamasyz etý, Jánibek aýdanyna «Batyr aýdan» mártebesin berý máselelerin kóterdi. Al agrarlyq mekeme ókilderi senatorlarǵa aýyl sharýashylyǵynyń ózekti máselelerin jetkizdi. Sondaı-aq Oral-Jánibek avtomobıl jolynyń qurylysyn jedeldetý týraly usynys aıtyldy.
Sapar barysynda E. Muqaev pen N. Tóreǵalıev aýdannyń eldi mekenderin gazben jáne aýyz sýmen qamtamasyz etýmen, aýyl ishindegi joldardy jóndeý jumystarymen tanysty.