Búgin Memleket basshysynyń tapsyrmasymen QR Premer-Mınıstri Baqytjan Saǵyntaev jumys saparymen Batys Qazaqstan oblysyna jumys saparymen keldi, dep habarlaıdy primeminister.kz.
Sapardyń maqsaty — Prezıdenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýlarynyń, «Bes áleýmettik bastamanyń», sondaı-aq memlekettik jáne salalyq baǵdarlamalardyń óńirde iske asyrylý barysymen tanysý.
Jumys saparynyń kestesindegi alǵashqy nysan álemdegi eń iri kásiporyndardyń biri — Qarashyǵanaq munaı-gaz kondensat ken orny boldy. Ol 280 kv km astam aýmaqty qamtıdy. О́ndirý kórsetkishteri respýblıkadaǵy barlyq gaz óndirýdiń shamamen 45% jáne suıyq kómirsýtekterdiń jalpy óndirisiniń shamamen 16% quraıdy, al jalpy baǵalaý qorlary 2,4 mlrd barrelden astam kondensat jáne 16 trln tekshe fýt gazdy quraıdy.
Aralaý barysynda Premer-Mınıstr B. Saǵyntaev kómirsýtek óndirisiniń tehnologııalyq úderisimen tanysty. «Qarashyǵanaq Petrolıým Opereıtıng B.V» kompanııasynyń bas dırektory Edvın Blom kásiporynnyń negizgi nátıjeleri týraly baıandady. Qarashyǵanaq 12 mlrd barrel suıyq kómirsýtek pen 57 trln tekshe fýt gazdy qamtıdy, olardyń shamamen 11% qazirgi tańǵa deıin óndirildi. E. Blom Qarashyǵanaqty ıgerýdiń 21 jyly respýblıka boıynsha barlyq ónerkásiptik kásiporyndar 42% qamtamasyz etildi, bul ken ornyn odan ári ıgerýdiń úlken keleshegi bar ekenin dáleldeıdi.
Onyń aıtýynsha, QPO ónerkásiptik qaýipsizdik, eńbekti jáne qorshaǵan ortany qorǵaý máselelerine erekshe nazar aýdara otyryp, jaqsy óndiristik kórsetkishterdi turaqty kórsetýde.
«Bizdiń ekologııalyq kórsetkishterimiz álemdik deńgeıge saı keledi. Ekologııalyq qaýipsizdiktiń óte qatań standarttary óndiriste ǵana emes, sondaı-aq, keń aýqymda da saqtalýda. Osymen ekinshi jyl qatarynan biz Oralda ekologııalyq forým uıymdastyrdyq, oǵan biz ekologııalyq qaýipsizdikti arttyrý máselelerin talqylaý úshin tek QPO qyzmetkerlerin ǵana emes, sonymen qatar merdigerlerdi de shaqyramyz. О́ıtkeni, búgingi kúni kórsetkishter jaqsy bolǵanymen, aldaǵy kúnderi olar jetkilikti túrde jaqsy bolmaýy múmkin. Qorshaǵan orta ózgerip jatyr», — dedi Edvın Blom.
Budan ózge, Baqytjan Saǵyntaevqa Qarashyǵanaq ken ornyn paıdalanýdy keńeıtý jáne merzimin uzartý qondyrǵylarynyń jumysy týraly tolyǵyraq baıandaldy. Búginde munaı negizinen Qara teńizdegi «Ońtústik Ozereevka» portyna aparatyn KQK qubyr jelisi arqyly eksporttalady. Munaıdy satýdyń taǵy bir baǵyty — «Transneft» kompanııasynyń kólik júıesimen baılanysatyn «Atyraý–Samara» qubyry arqyly jetkiziledi, ol Prımorsk portyna jáne birqatar eýropalyq baǵyttarǵa qoljetimdilikti qamtamasyz etedi.
Kásiporyndy tehnologııalyq jańǵyrtý jáne Indýstrııa 4.0 elementterin engizý týraly aıta otyryp, QPO bas dırektory búginde konsorsıým aksıonerleri Qarashyǵanaq ken ornyn ıgerýge $23 mlrd astam ınvestısııa salǵanyn aıtty. Ken ornyn ıgerý kezinde eń ozyq tehnologııalar paıdalanylady. Bul maksımaldy ekonomıkalyq kiris alýmen jer qoınaýyn tıimdi paıdalanýǵa múmkindik beredi. Sonymen qatar QPO basshylyǵy tehnologııalyq jabdyqtardy qoldaýǵa odan ári ınvestısııa salýǵa nıetti.
«Qazirgi tańda el Prezıdenti atap ótken sıfrlandyrý josparlary joǵary qulshynys týdyrady. Qaýipsizdik, ekologııalyq jaýapkershilik, adam kapıtaly jáne t.b. máselelerdi qamtıtyn birqatar bastamalardy kórip otyrmyz. QPO onsyz da joǵary tehnologııalyq kásiporyn, degenmen, sıfrlandyrý – bul asa damýshy ınnovasııalar, sondyqtan da jergilikti qyzmetkerlerdi únemi damytyp otyrý kerek», — dedi E. Blom, jergilikti taýar óndirýshilerdi qoldaý QPO-nyń negizgi basymdyqtarynyń biri ekenin jetkize otyryp.
Budan ózge, QPO Batys Qazaqstan oblysy turǵyndarynyń qajettilikteri úshin elektr energııasyn jetkizedi. Osy maqsattar úshin gaz-týrbınalyq elektr stansııasy jumys isteıdi, onyń negizgi maqsaty — ken ornynyń jáne jaqyn mańdaǵy eldi mekenderdiń barlyq óndiristik keshenin óziniń elektr qýatymen qamtamasyz etý.
QR Premer-Mınıstri Baqytjan Saǵyntaev «Kondensat» AQ zaýytynda munaı men gazdy óńdeýdiń tehnologııalyq tizbegi jumysynyń jalǵasymen tanysty. Munda Memleket basshysynyń qatysýymen ótken telekópir aıasynda K5 ekologııalyq sanatynyń benzınin shyǵarý iske qosyldy.
«Kondensat» AQ Dırektorlar keńesiniń tóraǵasy V. Júnisov zaýytty jańǵyrtý jumystary týraly, sondaı-aq óndiristi avtomattandyrý jáne sıfrlandyrý boıynsha qabyldanǵan sharalar týraly aıtyp berdi. 2017 jyly zaýyt jylyna 850 myń tonnaǵa deıin kásiporynnyń qýattylyǵyn arttyra otyryp jańǵyrtyldy. Budan ózge, 2018 jyldyń maýsym aıynda dızel otynyn K5 ekologııalyq sanatyna deıin gıdrotazartatyn qondyrǵy iske qosyldy. Jalpy, zaýytty rekonstrýksııalaýǵa barlyǵy $200 mln astam ınvestısııalar tartyldy.
Atalǵan jańǵyrtý jumystary elimizdiń ishki naryǵyndaǵy motor otyndarynyń tapshylyǵyn jabýǵa múmkindik berdi, sondaı-aq bıýdjetke aksızder men basqa da salyq tólemderiniń túsimin ulǵaıtty. Sonymen qatar, zaýyt joǵary bilikti jumys oryndaryn asha otyryp, oblystyń 1000-nan astam turǵynyna (kásiporyn qyzmetkerleri men olardyń otbasylaryna) laıyqty tabys ákeledi. Jańa benzın qondyrǵylary iske qosylǵan sátten bastap K5 joǵary ekologııalyq sanatynyń 80 myń tonnadan astam benzıni shyǵaryldy. Osy kezeńde oblystyq bıýdjetke shamamen 1 mlrd teńge aksız tólendi.
Zaýytta óndiriletin joǵary oktandy benzın men dızel otyny Batys Qazaqstan oblysynda ǵana emes, jaqyn mańdaǵy oblystarda da satylady. Budan ózge, shyǵarylǵan ónimniń jartysy shetelge eksporttalady. Máselen, vakýýmdyq gazoıl Belarýske eksporttalady, al gýdrondy satý Reseıge baǵyttalǵan.
Batys Qazaqstan oblysy elimiz úshin mańyzdy ónerkásiptik mánge ıe. О́ńirde munaı-gaz óndirý, munaı ónimderin óńdeý, mashına jasaý, metallýrgııa, qorǵanys, taý-ken ónerkásibi, tigin jáne azyq-túlik ónerkásibi kásiporyndary bar. 2018 jyldyń qańtar–maýsym aılarynda ónerkásiptik óndiris kólemi 1184,6 mlrd teńgeni qurady. Naqty kólem ındeksi 2017 jylǵy sáıkes kezeńniń 98,6%-yn qurady. IIDMB jáne Indýstrııalandyrý kartasy aıasynda 2018 jyly 7 mlrd teńgege 262 jumys ornyn qurýmen 7 joba iske asyrylýda.
Sondaı-aq, jumys sapary barysynda Premer-Mınıstr B. Saǵyntaev birqatar óndiristik jáne áleýmettik ınfraqurylym nysandaryn aralap, oblys aktıvterimen jáne bıznes ókilderimen jobalyq basqarý máseleleri jóninde kezdesý ótkizedi.
Atap aıtqanda, «Oral — Tasqala — Ozınkı RF shekarasy» jáne «Qaztalov — Jánibek — Bókeı ordasy» avtojoldarynyń qurylys barysy tekseriledi. Bul baǵyttar aýdan ortalyqtarynyń oblys ortalyǵymen qatynasyn damytady. Munda Premer-Mınıstr Qaztalov, Jánibek jáne Bókeı orda aýdandarynyń ókilderimen «Nurly jol» memlekettik baǵdarlamasyn iske asyrý barysyn talqylaıdy.
Budan keıin Premer-Mınıstr «Nurly jer» baǵdarlamasy boıynsha turǵyn úı qurylysynyń barysyn tekserýge jáne «7–20–25» baǵdarlamasynyń iske asyrylý barysymen tanysý úshin Zashaǵan kentine barady.
B. Saǵyntaev mamandandyrylǵan Halyqqa qyzmet kórsetý ortalyǵynda memlekettik qyzmetterdi avtomattandyrý prosesimen jáne «Sıfrlyq Qazaqstan» memlekettik baǵdarlamasynyń óńirlik jobalarynyń iske asyrylýymen tanysady.
Premer-Mınıstrdiń jumys sapary oblys aktıvimen jáne bıznes ókilderimen ótetin keńespen aıaqtalady, onda jobalyq basqarý máseleleri talqylanyp, osy jyldyń 6 aıyndaǵy jumystardyń qorytyndylary shyǵarylyp, Prezıdenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýlarynda, «Bes áleýmettik bastamasynda» berilgen mindetterdi odan ári sheshýge qatysty josparlar qaralady.
Eske sala keteıik, Baqytjan Saǵyntaev Memleket basshysynyń tapsyrmasymen elimizdiń óńirlerin jumys saparymen aralap júr. Buǵan deıin Atyraý, Qaraǵandy, Qostanaı, Qyzylorda, Mańǵystaý, Ońtústik Qazaqstan, Aqmola, Aqtóbe oblystaryna baryp qaıtty.