Elimizde jańa aýmaqtyq saılaý komıssııalaryn qurý týraly qaýly Berik Imashevtiń tóraǵalyǵymen ótken Qazaqstan Ortalyq saılaý komıssııasynyń otyrysynda qabyldandy, dep habarlady OSK BAQ-pen baılanys bólimi.
Ortalyq saılaý komıssııasy «Qazaqstan Respýblıkasyndaǵy saılaý týraly» Konstıtýsııalyq Zańynyń 10-babynyń 3-tarmaǵyna jáne «Astana qalasynyń shekarasyn ózgertý týraly», «Almaty oblysynyń ákimshilik-aýmaqtyq qurylymyndaǵy ózgerister týraly», «Ońtústik Qazaqstan oblysynyń ákimshilik-aýmaqtyq qurylymyndaǵy ózgerister týraly» Qazaqstan Prezıdentiniń Jarlyqtaryna sáıkes Almaty oblysynda Kegen aýdandyq aýmaqtyq saılaý komıssııasyn, Túrkistan oblysynda Jetisaı, Keles aýdandyq aýmaqtyq saılaý komıssııalaryn jáne Astana qalasynda Baıqońyr aýmaqtyq saılaý komıssııasyn qurý týraly qaýly qabyldady.
Sonymen qatar ákimshilik-aýmaqtyq birlikterdegi halyq sanyna sáıkes saılanatyn máslıhattar depýtattarynyń sanyn belgileý erejeleri, Qazaqstan Respýblıkasy aýmaqtyq, okrýgtik jáne ýchaskelik saılaý komıssııalary mórleriniń úlgileri, Qazaqstan Respýblıkasy Ortalyq saılaý komıssııasynyń keıbir qaýlylarynyń kúshi joıyldy dep taný jónindegi qaýlylar qabyldandy.