Taıynsha aýdandyq ortalyq aýrýhanasynda búırektiń asqynǵan aýrýynan zardap shegetin naýqastar tolyqqandy em-dom alatyn bolady. Osynda ashylǵan kabınetti qajetti quraldarmen jabdyqtaýǵa 50 mıllıon teńgeden astam qarjy jumsaldy.
«Gemodıalız – qandy búırekten tys tazartý ádisteriniń biri. Aýdan boıynsha atalmysh aýrýǵa shaldyqqan 12 adam esepte tur. Bul shara kepildendirilgen tegin medısınalyq kómek aıasynda júrgiziledi. Sozylmaly búırek jetispeýshiligi dertine ushyraǵan naýqastar aptasyna 3 ret qandaryn tazartyp otyrady. Bir aýysymda 6 naýqasqa em-dom qoldanylady», deıdi aýdandyq ortalyq aýrýhananyń bas dárigeri Anatolıı Rafalskıı.
Oblystyq densaýlyq saqtaý basqarmasynyń basshysy Tımýr Sultanǵazıevtiń aıtýynsha, óńirde atalmysh em-domdy qajet etetin turǵyndardyń sany birshama artqan. Byltyr125 naýqas tirkelse, bıyl 137-ge jetken. Budan sozylmaly búırek dertine shaldyqqandardyń bári gemodıalız em-sharasyn qabyldaýy mindetti degen oı týmasa kerek. Qan búırek aýrýynyń tórtinshi kezeńinde tazartylady. Gemodıalızdiń balamasy – búırekti aýystyrý. Oblysta 22 adamnyń búıregin aýystyrý otasy jasalǵan.
Petropavlda alǵashqy qan tazartý ortalyǵy 2014 jyly ashylǵan bolatyn. 12 apparat ornatylǵan ortalyqta 62 naýqas em qabyldaıdy. «Nefros»-SK» JShS-niń dırektory Lılııa Gmyzınanyń sózine qaraǵanda munda aýyl turǵyndary da keledi. Alaıda em-dom baǵasy qymbat ári baryp-kelýi kóp ýaqyt alatyndyqtan, aýdandarda gemodıalız ortalyqtaryn ashý týraly usynys aımaq basshysy Qumar Aqsaqalovtyń tarapynan qoldaý tapqan.
Jańa qan tazartý ortalyǵyTaıynsha, Aqjar, Ýálıhanov jáne Aıyrtaý aýdandarynyń turǵyndaryna qyzmet kórsetedi. Aldaǵy ýaqytta Shal aqyn aýdanynda iske qosý josparlanǵan.
О́mir ESQALI,
«Egemen Qazaqstan»
Soltústik Qazaqstan oblysy