Biryńǵaı jınaqtaýshy zeınetaqy qory qyzmetterin ońtaılandyrý maqsatynda salymshylary úshin zamanaýı qyzmetter usynyp otyr. Endigi kezekte enpf.kz saıtynda erikti zeınetaqy jarnalary boıynsha shart jasaýǵa múmkindikter jasaldy.
Qor salymshylary úshin jartyjyldyq boıynsha esep bergen BJZQ mamandary zeınetaqy qyzmetteriniń salymshylar úshin de alýshylar úshin de qoljetimdi ekendigin jetkizdi. Saıt arqyly «Jeke kabınet» jáne «Elektrondyq qyzmet kórsetý» bólimi arqyly kelisimshart jasaýǵa bolady. Ony paıdalaný úshin salymshylarda elektrondy sıfrlyq (ESQ) kilt bolsa jetkilikti.
BJZQ tóraıymy N.Naýryzbaeva aǵymdaǵy merzimdegi kórsetkishterge sholý jasap, zeınetaqy jınaqtarynyń jalpy somasy 8,4 trıllıon teńgeni quraǵandyǵyn ári jyl basynan bergi aralyqta 663,6 mlrd teńgege, ıaǵnı 9 paıyzǵa óskendigin málimdedi.
Jartyjyldyq qorytyndysyna sáıkes qorǵa 5,6 mıllıonnan astam salymshy zeınetaqy jarnalaryn aýdarǵan. Osy merzimdegi túsimderdiń jalpy somasy 407,5 mlrd teńgege (keri qaıtarylǵan jarnalardy esepke almaǵanda) jetti. Kórsetkish ótken jylmen salystyrǵanda (366,4 mlrd teńge) 11 paıyzǵa joǵary. Túsimderdiń negizgi úlesi mindetti zeınetaqy jarnalaryna tıesili.
Salymshylar men alýshylardyń zeınetaqy shottaryna eseptelgen taza ınvestısııalyq tabys somasy 356,4 mlrd teńgeni qurap otyr. Iаǵnı, jyl basynan beri tabys 4,5 paıyzdy qurasa, bul kezeńdegi ınflıasııa deńgeıi 2,6 paıyz bolǵan. Al qordyń bir jyly ishindegi tabysy 9,5 paıyzdy qurap otyr.
Qor tarapynan ekonomıkalyq belsendi azamattardy jınaqtaýshy zeınetaqy júıesine tartý ári qorǵa birneshe jyldar qatarynan jarna aýdarmaǵandar salymshylarmen jumystar qolǵa alynǵan. Derekqorda 2015-2017 jyldar aralyǵynda ashylyp, birde-bir nemese turaqty jarna túspegen shottar anyqtaldy. Tıisti merzim ishinde 218,4 myńnan astam salymshymen baılanys ornatylyp, 29 myńǵa jýyq azamatqa keńester berilgen. Al osy ýaqytta 50,65 myń shotqa jarna aýdarylǵan.
Aǵymdaǵy jyldyń mamyr aıynda BZJQ «Telegram» messendjerine qosyldy. Paıdalanýshylar jańa qyzmettiń kómegimen qysqasha kóshirme alý, elektrondyq poshtasyna jiberý, «Jeke kabınetke» kirý parolin qalpyna keltirý, mańyzdy jańalyqtar jáne aǵymdaǵy kórsetkishterimen tanysý múmkindigine ıe bolsa, shilde aıynda iske qosylǵan «WhatsApp» qyzmeti el ishinde jáne shetelde júrgenderge jınaqtaýshy zeınetaqy júıesi týraly qajetti aqparatty jedel alýǵa múmkindik beredi. Al qor bólimsheleri joq aýdandarda zeınetaqy qyzmetteriniń qoljetimdiligin qamtamasyz etý maqsatynda «Mobıldik keńse» jobasy iske qosylyp, qajetti tehnıkalarmen jáne jerseriktik baılanys quralymen jabdyqtalǵan. Bıylǵy jyldyń 16 sáýiri men 30 maýsymy aralyǵynda «Mobıldik keńse» 75 ret jolǵa shyǵyp, respýblıka aımaqtary boıynsha salymshylarmen baılanys ornatty.
Elvıra Serikqyzy,
«Egemen Qazaqstan»
ALMATY