Kanadanyń 28 jastaǵy tanymal hokkeıshisi, 2018 jyly Ońtústik Koreıanyń Phenchhan qalasynda alaýy tutanǵan Olımpııa oıyndarynyń qola júldegeri Brendon Kozýn aldaǵy kúnderi Astananyń «Barys» klýby sapynda oınaıdy.
Brendon AQSh-tyń Los-Andjeles qalasynda dúnıege kelgenimen, onyń áke-sheshesi erterekte Kanadaǵa qonys aýdardy. Shaıbaly hokkeı álippesin ol Kalgarı qalasynda úırendi. 2010 jyly jastar arasyndaǵy álem birinshiligine qatysyp, kúmis medaldi moınyna ildi. 2014 jylǵa deıin Kozýn ekinshi deńgeıli dıvızıondara óner kórsetse, 2014/2015 jylǵy maýsymdy Ulttyq hokkeı lıgasynyń «Toronto Meıpl Lıfs» (UHL) klýbynda ótkizdi. Odan keıin Qurlyqtyq hokkeı lıgasyna (QHL) aýysyp, Helsınkıdiń «Iokerıti» jáne Iаroslavldiń «Lokomotıvinde» oınady. Shabýyl shebinde erkin oıqastaǵan surmergen 2015/2016 jylǵy maýsymda 58 ret muz aıdynyna shyǵyp, 49 upaı (15 gol+34 pas) jıdy. 2016/2017 jylǵy maýsymda 59 kezdesý ótkizip, 56 upaıdy (23 gol+33 pas) ıelendi.
Kanadanyń ulttyq quramasy sapynda Brendon Kozýn birqatar halyqaralyq týrnırlerde oljaǵa keneldi. Solardyń arasyndaǵy eń mańyzdysy – 2018 jylǵy Phenchhan Olımpıadasynda qola medaldi ıelenýi. Sol jarysta ol gol soqpaǵanymen, áriptesterine eki márte nátıjeli pas berdi. Al 2016, 2017 jáne 2018 jyldary Úıeńki japyraqtar eliniń ókili QHL-dyń «Juldyzdar matchynda» óner kórsetti.
Ǵalym SÚLEIMEN,
«Egemen Qazaqstan»