25-26 tamyzda Astanada «Etnoaýyl» Ulttyq-mádenı kesheni aýmaǵynda aýqymdy open air ótedi.
Uıymdastyrylar barlyq sharalar men ekspozısııalar kóne dáýirdegi tarıh pen búgingi kúnder jetistigin, qazaq halqy sheberleriniń ónerin, urpaqtar sabaqtastyǵyn túgel qamtıdy.
Kórmeniń maqsaty – qazaq mádenıetiniń jańa zaman yrǵaǵyna sińisip, beıimdelýin nasıhattaý, jastardyń tarıhı qundylyqtarǵa qyzyǵýshylyǵyn oıatyp, halyq sheberleriniń jumysyn kórsetý.
Kórmege qatysatyn qolóner sheberleri ózderiniń qolynan shyqqan buıymdaryn kórsetýmen qatar, jańa ónerdi úırenýge erik bildirgen barlyq jandarǵa arnap sheberlik saǵattaryn tegin ótkizedi. Kelýshiler er-toqym, aýyzdyq pen qamshy sekildi at ábzelderin de tamashalaı alady.
Kórmede elimizdiń ár aımaǵynan kelgen tarıhı jádigerler ornalastyrylady. Kelýshi qonaqtar ótken ǵasyrǵa saıahat jasap, sol dáýirdegi kıimder men áshekeıler, turmystyq buıymdar men orta ǵasyrlarda qoldanylǵan ózge de zattardy tamashalaı alady. olardyń ishinde kóne zaman kóshpendileriniń buıymdary da bar. Sol zaman adamdarynyń kostıýmderi men qarý-jaraq ózge de atrıbýttarynyń ǵylymı jolmen qaıta qalpyna keltirilgen naqty kóshirmeleri qoıylady.
Etnodızaınerler baıqaýynyń baǵdarlamasynda qazirgi zamanǵy qazaqy kıimderdiń úlgileri kórsetiledi. Sonymen qatar «Tomırıs» pen kishkentaı búldirshinderge arnalǵan «Jas batyr» kostıýmder baıqaýy uıymdastyrylady.
Kórkimen kóz tartqan kıiz úılerde ıisi muryn jaratyn dámdi taǵamdar pisiriledi. Munda meımandar baýyrsaq, qurt pen jent jáne t.b. dástúrli qazaq taǵamdarynan aýyz tıe alady.
Shara sońynda folklorlyq mýzykany erekshe ınterpretasııada usynar ónerpazdardyń gala-konserti uıymdastyrylady. Kómeımen oryndaýshylardyń zamanaýı úlgilerin usynar Tıýrgen Kam men «Arqaıym» neo-etno-folk toby da ánnen shashý shashady.
Osy sharaǵa kelýshilerdi etno stılinde jumys isteıtin dıdjeılerdiń alǵashqy qazaqstandyq baıqaýy kútip tur. Qobyz, dombyra men ózge de dástúrli aspaptardyń zaman aǵymyna saı beıimdelgen áýenderi shyraıly keshti áserli qyla túspek.
Jazǵy maýsymnyń shymyldyǵyn «Qazaqstan – uly dala eli» respýblıkalyq kórmesi jabady. Aýqymdy sharaǵa keler qonaqtar erekshe emosııaǵa bólenip, týǵan ulttyń tarıhynyń jańa paraqtarymen tanysady.
Shara Qazaqstan Respýblıkasy mádenıet jáne sport Mınıstrliginiń tapsyrysymen ótkiziledi. Kórmeni saǵat 10.00-22.00 aralyǵynda tamashalaýǵa bolady, kirý tegin. Qonaqtarǵa qolaıly bolýy úshin «Han Shatyr» SOO-dan «Etnoaýylǵa» deıin saǵat 10.00-21.00 aralyǵynda tegin avtobýstar qatynaıdy.