Ǵarysh salasynyń mamandary 2002 jyldan beri qaraı Baıqońyrdaǵy birneshe ǵaryshtyq alańdardan ushqan 158 zymyran-tasyǵyshtyń Qazaqstannyń ústinen ótý barysyn jiti baqylaýda ustap keledi. Ushý barysynda janarmaı shamasyna qaraı janyp taýsylǵan nemese shala janyp shashylǵan aýyr tehnıkanyń birinshi satysy qulaıtyn 18 aýdanǵa mamandar ýaqyt ótkizbeı attanady, barlyq málimetti tirkeıdi. Bul aýmaqta turyp jatqan halyqtyń densaýlyǵyna Baıqońyrdaǵy árbir ǵaryshtyq ushýdyń qanshalyqty áser etetindigi týraly derekter qajetinshe jınaqtalǵan, qujattar qattalǵan.
Elimizdiń Qorǵanys jáne aeroǵarysh ónerkásibi mınıstrligi Aeroǵarysh komıtetiniń «Ǵarysh-Ekologııa» ǴZO» RMK bas dırektory Jaılaýbaı Jubatov Almatyda jýrnalıstermen kezdesýi barysynda osy turǵydaǵy málimetterdi ortaǵa saldy. Belgili maman qazaqstandyq ǵarysh mekemesiniń hımııalyq-saraptamalyq zerthananyń qyzmeti men onyń negizgi keńsesiniń qyzmeti týraly da aıtyp berdi.
Kásiporynnyń mindeti – oqtaı ushqan zymyran tasyǵyshtyń kenet apatty jaǵdaıǵa dýshar bolyp qulaǵan sátinde aýmaqtaǵy ekologııalyq zardabyna monıtorıng jasap, onyń qorshaǵan ortaǵa, adamdarǵa qanshalyqty qaýipti nemese qaýipsiz ekenin aıǵaqtaý. Bul ekologııalyq jáne áleýmettik-gıgıenalyq saraptamalardyń barlyǵy atalmysh kásiporynnyń geoaqparattyq bazasynda muqııat saqtalady. Munda qazirdiń ózinde 200 myńǵa jýyq aqparattar jıyntyǵy bar.
Qazaqstandyq «Ǵarysh-ekologııa» respýblıkalyq memlekettik kásipornynyń ǵylymı qoldanbaly jobasynyń júzege asýy arqasynda birqatar ádistemelik baǵdarlamalar dúnıege keldi. Zymyran otynynyń komponentterin zertteıtin, transformasııalanǵan geptıl men T-1 zymyran kerosıniniń gıgıenalyq ónim normalaryn tekseretin, topyraqty detoksıkasııalaýdyń (zalalsyzdandyrýdyń) tehnologııalyq reglamenttterin qadaǵalaıtyn naqty jumystar atqarylady.
Máskeý túbinde ótip jatqan «Armııa-2018» halyqaralyq áskerı-tehnıkalyq forýmy aıasynda Qazaqstan men Reseı taraptary Baıqońyr aýmaǵynda qazaqstandyq «Báıterek» zymyrany keshenin salý týraly kezekti kelisimge qol qoıdy.
Talǵat SÚIINBAI, «Egemen Qazaqstan»
ALMATY