Búginde Qazaqstannyń kórshi О́zbekstanmen qarym-qatynasy nyǵaıa túsken. Qaı salada bolsyn, mádenı, saýda-sattyq jáne basqa da máselelermen barys-kelis jıilegen. Keden beketteriniń de qyzmeti burynǵydan qyzý. Bul oraıda keden qyzmetkerleri qalypty jumys istep, mindetterin minsiz atqarýǵa tyrysýda.
Jýyrda áleýmettik jelilerde Qazaqstan-О́zbekstan shekara beketinen ótý úshin júk avtokólikteriniń saǵattap kezekte turatyny týraly aqparat taraǵan bolatyn. Alaıda, Túrkistan oblystyq Memlekettik kirister departamenti áleýmettik jelilerde taraǵan aqparatty joqqa shyǵardy. Departament ókilderiniń aıtýynsha, «Qaplanbek» shekara beketinen ótýge esh kedergi joq. Oblystaǵy qazaq-ózbek shekara beketterinde azamattardy ótkizý toqtatylmaǵan. Al Qarjy mınıstrliginiń Memlekettik kirister komıteti: «О́zbekstannyń jaqyn jáne alys sheteldermen syrtqy saýdany damytýyna baılanysty Qazaqstan aýmaǵy arqyly О́zbekstanǵa qaraı taýarlar aǵyny edáýir ulǵaıdy. Osyǵan baılanysty 2018 jyldyń naýryz aıynan beri «B.Qonysbaev» ótkizý beketi aldynda Qazaqstan jaǵynan 50-100 shamaly júk kóliktiń jınalyp qalýy baıqala bastady», – dep habarlady.
Komıtet málimeti boıynsha, «B.Qonysbaev» beketi táýligine 150 avtokólikti ótkize alady. Degenmen, búginde «B.Qonysbaev» keden beketi kúsheıtilgen rejimde jumys istep, táýligine 250-ge deıin avtokólik ótkizýde. «1 tamyz ben 7 tamyz aralyǵynda Qazaqstan jaǵynan О́zbekstanǵa kólikterdiń jınalyp qalýy 200-den 315-ke deıin kóbeıdi. Bul kezeńde ózbek jaǵy tehnıkalyq sebepterge baılanysty ótkizýdi táýligine 100 birlikke deıin (buryn 130-140 kólik ótkizetin) tómendetti», dep túsindiredi oryn alǵan jaıtty komıtet.
Sondaı-aq «kólikterdi ótkizýdi jedeldetý boıynsha eki keden beketi basshylarynyń kezdesýi kún saıyn ótkiziletinin» habarlady. Ázerbaıjan, Belarýs, Reseı jáne Qyrǵyzstannyń keden qyzmetterine júk aǵynyn, О́zbekstanǵa «Qazyǵurt», «Qaplanbek» jáne «Atameken» ótkizý beketteri boıynsha qaıta bólý jóninde hat joldanǵan. Sonymen birge sheteldik avtokólik quraldarynyń О́zbekstan aýmaǵy arqyly tranzıttik ótýi Túrkistan oblysyndaǵy «Iаllama (О́zbekstan) – «B.Qonysbaev» (Qazaqstan) jáne Mańǵystaý oblysyndaǵy «Qaraqalpaq» (О́zbekstan) – «Tajen» (Qazaqstan) ótkizý beketteri arqyly ruqsat etiletini túsindirilgen. «Sońǵy aptada ózbek jaǵy avtokólikterdi ótkizýdi táýligine 150-ge deıin ulǵaıtty. Memlekettik kirister komıteti 16 tamyzda Qazaqstannan О́zbekstanǵa avtokólikterdiń jınalyp qalýy 190-ǵa deıin tómendegenin habarlady. Bul máseleni sheshý úshin «B.Qonysbaev» ótkizý beketin keńeıtý arqyly qaıta qurý josparlanǵan. Qaıta qurýdan soń avtokólikterdi ótkizý kórsetkishi táýligine bir myńǵa jetetin bolady. Qurylys merzimi – 19 aı», delingen mınıstrlik habarlamasynda.
Qalaı bolǵanda da, keden qyzmetkerleri ótkizý beketterinde júk kólikteriniń júrgizýshileri ýaqytsha oryn alǵan jaǵdaıǵa túsinistikpen qaraıtynyn jetkizdi.
Ǵalymjan ELShIBAI,
«Egemen Qazaqstan»
Túrkistan oblysy