Qoldaryna túrli-tústi shar ustap, erekshe kóńil-kúımen qalanyń qaq ortasyndaǵy Respýblıka alańyna jınalǵan halyqty oblys ákimi Danıal Ahmetov merekemen quttyqtap, lebizin jetkizdi.
«1995 jylǵy 30 tamyzdaǵy jalpy halyqtyq referendýmnan keıin qabyldanǵan negizgi zańymyz elimizdiń damýyna tyń serpin berdi. Ata zańymyz Táýelsizdiktiń eleń-alań shaǵynda demokratııalyq qoǵamnyń damýyna berik negiz boldy. Árıne, bul rette Elbasy Nursultan Nazarbaevtyń eren eńbegin atap ótpeske bolmaıdy», dedi aımaq basshysy.
Bul kúni ortalyq alańda búldirshinder qurmetine ártúrli oıyn alańdary jumys istedi. Sonymen qatar ártúrli promoaksııalar, sporttyq saıystar uıymdastyryldy. Merekege kelgen jurt oblys ákiminiń sımfonııalyq orkestri men Baıjigit atyndaǵy ulttyq aspaptar orkestriniń jáne «Inkoro» vokaldyq tobynyń ónerin tamashalap, aýyl sharýashylyq jármeńkesinen azyq-túlik ónimderin satyp aldy.
Dostyq úıinde «Mektepke - jol» aksııasy aıasynda áleýmettik turǵydan az qamtylǵan balǵyndarǵa oqý quraldary taratyldy.
Búgin oblys ortalyǵynda merekege oraı 100-ge jýyq is-shara josparlanypty.
Merekelik sharalar shahardyń ár aýmaǵynda áli de jalǵasyp jatyr.
Azamat QASYM,
«Egemen Qazaqstan»
О́SKEMEN