Kóne zamannan jetken ańyzdar boıynsha, shamamen HVI ǵasyrda ómirge kelgen alban rýynan taraıtyn Jarty Súıerqululy babanyń tarıhyna qatysty ańyz-derekter az emes.
El arasynda keńinen taraǵan «Jarty aman bolsa, jalpy aman bolady» degen támsil áli de syry ashylmaǵan tarıhı derekterdiń bar ekendigine meńzep tursa kerek-ti. О́z zamanynda kóripkel áýlıe, juldyzshy, emshi-táýip bolǵandyǵyna qazirgi qolda bar ǵylymı derekter dálel bolsa, birge týǵan Qojbanbet bı men áıgili Shoǵan abyzdyń júrip ótken ómir tarıhy da Musylmanbaı – Jarty baba ómir keshken kezeńniń aıǵaǵyndaı.
Búginde irgeli elge aınalyp, qanatyn keńge jaıǵan urpaqtyń uıymdasýymen Almaty oblysy Uıǵyr aýdanynyń Shonjy aýylynda «Rýhanı jańǵyrý» baǵdarlamasy aıasynda Jarty babaǵa arnalǵan memorıaldyq keshenniń ashylý saltanaty ótti. Uıǵyr aýdanynyń ákimi Shýhrat Nýrahýnov qalyń kópshilikke jyly lebizin bildirip, Almaty oblysynyń ákimi Amandyq Batalovtyń osy sharaǵa arnalǵan quttyqtaý sózin oqydy.
«Rýhanı jańǵyrý» baǵdarlamasy aıasynda tarıhı eskertkishter men mádenı nysandardy qalpyna keltirý, el tarıhynda ótken azamattardyń esimderin jańǵyrtý arqyly urpaqqa ulttyq tarıhymyzdy tanyta alatynymyz kámil ekendigin atap ótken aýdan ákimi osy sharaǵa aqjarma tilekterin arqalaı kelgen Sarqan, Kóksý, Qaratal, Panfılov, Raıymbek, Kegen aýdandarynyń azamattaryna alǵysyn bildirdi.
Qulashyn keńge sermegen máýeli báıterek bolyp beınelengen eskertkishtiń ashylýynda «Nur Otan» partııasy Tóraǵasynyń birinshi orynbasary Máýlen Áshimbaevtyń quttyqtaý sózi oqyldy.
Jazýshy Nurlan Orazalın bul shara Jarty babaǵa ǵana emes, qazaqtyń qazaq bolyp qalýyna úles qosyp, Alashtyń týyn ustaǵan myńdaǵan babalarymyzǵa jasalǵan qurmet, dep atap ótse, sharany uıymdastyrý komıssııasynyń tóraǵasy, Almaty oblystyq máslıhatynyń depýtaty Yzǵarbek Bektursynov «Rýhanı jańǵyrý» baǵdarlamasy aıasynda taǵylymy zor, tárbıelik máni mol Jarty baba urpaqtarynyń uıytqy bolýymen salynǵan «Jarty baba» memorıaldyq kesheni men «Túp-tuqııan toǵaıy» saıabaǵy Máńgilik El bolý jolyndaǵy izgi murattardyń biri bolyp qalatyndyǵyna toqtaldy. Sondaı-aq esimi elimizge tanymal pýblısıst-jazýshy Telman Januzaqov, qalamger Baqqoja Muqaı syndy Jarty babadan taraıtyn urpaqtardy maqtanyshpen atap ótti. Olardyń qatarynda sonymen qatar professor Telǵoja Januzaq, jazýshy-jýrnalıst, elimizdiń bas gazeti «Egemen Qazaqstanda» vıse-prezıdent-bas redaktor bolǵan Janbolat Aýpbaev, jazýshy Dánesh Ahmetov, professor Sherýbaı Qurmanbaıuly, Qazaqstan Respýblıkasynyń eńbek sińirgen ártisteri Sulýshash Nurmaǵanbetova, Murat Ahmanov, Memlekettik «Daryn» jastar syılyǵynyń ıegeri, osy memorıal-eskertkishtiń avtory Eldos Elmuratuly, dástúrli ánshiler Tileýles Qurmanǵalıev pen Ardaq Balajanova, aqyn-jýrnalıst Nurlan Qalqa, oblystyq «Jetisý» gazetiniń tilshisi Ulbosyn Bóribaıqyzy, oblystyq «Jetisý» gazeti bas redaktorynyń orynbasary Jumataı Ospanuly men jeti jasynan alty Alashqa tańdaı qaqtyrǵan bala Jambyl esimderine erekshe toqtalyp ótti.
Shara barysynda Qazaqstannyń halyq ártisi Asanáli Áshimov, general-leıtenant Ádil Shaıahmetov, t.b. azamattar izgi lebizderimen bólisse, uıymdastyrýshylar osy ıgi iske qoldaý bildirgen azamattarǵa at mingizip, shapan japty. Al Qazaqstannyń halyq ártisi Nurǵalı Núsipjanov, Sulýshash Nurmaǵanbetovamen qatar Jiger Aýypbaev, t.b. jas ónerpazdar án salyp, dala tósin kóńildi áýenge bóledi. Kók maısada qanatyn keńge jaıǵan ań shańqan kıiz úıler kelgen qonaqtarǵa esigin aıqara ashyp, «Jarty baba shejiresi» kópshilikke úlestirildi. Kıeli Qaradalany dúrildetken dúbirli shara qazaqtyń at báıgesine ulasty.
Elvıra SERIKQYZY,
«Egemen Qazaqstan»
Almaty oblysy