Reseıdiń Elısta qalasynda bokstan stýdentter arasyndaǵy álem birinshiligi aıaqtaldy. Osy jarysta baq synaǵan tórt jerlesimizdiń úsheýi elge oljaly oraldy.
52 keli keli salmaq dárejesinde óner kórsetken Abaı Qýandyqovtyń óneri kópshiliktiń kóńilinen shyqty. Jartylaı fınalda Byltyr Shymkentte ótken álel birinshiliginde qola medaldi qanjyǵasyna baılaǵan aqtóbelik boksshy bul jarysqa jaqsy babynda kelgen eken. Jartylaı fınalda japondyq Nagakakı Rıýýatorny utqan ol aqtyq synda taıpeılik Nıen Shın Shenge shań qaptyryp ketti. Osylaısha, Abaı álem chempıony atanyp, barsha qazaqstandyq jankúıerlerdi qýantty.
69 kılo salmaqta synǵa túsken Bekbolat Quramysov osydan eki jyl buryn Taılandtyń Chıang-Maı qalasynda ótken stýdentterdiń álem birinshiliginde kúmis medaldi ıelengen bolatyn. Bıyl da ol dál sol kórsetkishin qaıtalady. Jartylaı fınalda polshalyq Vashala Fılıpke san soqtyrǵan atyraýlyq boksshy sheshýshi tusta Taıpeıdiń ókiline ese jiberip, kúmis medaldi ıemdendi.
60 kılo salmaqtaǵy Erjan Ordabaev ta jarysty jap-jaqsy bastaǵan edi. Alaıda jartylaı fınalda ol óte myqty qarsylasqa tap boldy. Nátıjesinde Reseı chempıony, Eýropa chempıonatynyń kúmis júldegeri Gabıl Mámedovqa ese jiberip, qola medaldi qanaǵat tutty.
2016 jyly Taılandtyń Chıang-Maı qalasynda ótken álem chempıonatynda Qazaqstan quramasy 3 altyn, 1 kúmis jáne 2 qola medaldi enshilep, komandalyq esepte úzdik úshtiktiń qatarynan kóringen edi. Bul jolǵy jarysqa biz sanaýly sportshylardy ǵana apardyq. Onyń ózindik sebepteri bar. Atap aıtsaq, kóptegen myqty boksshylarymyz Azııa oıyndarynda óner kórsetti, keıbireýleri taıaý kúnderi ótetin Qazaqstan boks federasııasy kýbogyna daıarlanyp jatyr. Osyndaı kedergilerge qaramastan Elıstaǵa attanǵan tórt jerlesimizdiń úsheýi elge oljaly oraldy. Komandalyq esepte besinshi orynǵa taban tiredik. Bul da jaman nátıje emes, – deıdi Qazaqstannyń stýdentter quramasynyń aǵa jattyqtyrýshysy Dastan Sádýaqasov.
Ǵalym SÚLEIMEN,
«Egemen Qazaqstan»