Qurlyqtyq hokkeı lıgasynyń (QHL) alǵashqy týrlarynyń qorytyndysy boıynsha «Barys» eń kóp soqqan komandalardyń kóshin bastap keledi.
Astanalyq hokkeıshiler QHL-dyń turaqty birinshiliginiń alǵashqy úsh kezdesýinde qarsylastar qaqpasyn 14 márte dál kózdedi. Ekinshi jáne úshinshi oryndarda – Fınlııandııanyń «Iokerıti» men Ombynyń «Avangardy». Olar 13 goldan soqty. Tórtinshi satyǵa 11 shaıba salǵan Tómengi Novgorodtyń «Torpedo» jaıǵasty. Esterińizge sala keteıik, maýsymnyń tusaýkeser kezdesýinde jerlesterimiz Nıjnekamskiniń «Neftehımıgin» 6:1 esebimen utty. Ekinshi básekede Qazannyń «Aq Barsynan» 3:4 esebimen jeńildik. Úshinshi oıynda Tómengi Novgorodtyń «Torpedosymen» kúsh synasyp, overtaımda 5:6 esebimen ese jiberdik. Osy úsh matchtyń barlyǵyn da «Barys» syrtta ótkizdi.
Ár kezdesý saıyn bizdiń jigitter qarsylastar qaqpasyna topyrlatyp gol soǵyp jatsa, árıne, qýanamyz. Alaıda osyndaı nátıjeli oıyn órnegin kórsete otyryp, jeńiske qol jetkize almaýymyz bizdi qattyraq qynjyltady. Sonyń saladarynan qajetti upaılardan aıyrylyp jatqan jaıymyz bar. Máselen, joǵaryda aıtylǵan úsh oıynda 14 gol soqqanymyzben, ózimiz 11 shaıba jiberip aldyq. Qazannyń «Aq Bars», Cherepovestiń «Severstal», Vladıvostoktyń «Admıral», Máskeýdiń «Dınamo» jáne Bratıslavanyń «Slovan» klýbtary da dál sondaı jaǵdaıdy basyna keshirýde. Al osy qolaısyzdaý kórsetkish jaǵynan joǵaryda atalǵan komandalardyń aldyn Habarovskiniń «Amýry» men Novosıbırskiniń «Sibiri» orap tur. Alǵashqy úsh týrda óz qakpasyna «Amýr» – 13, «Sibir»14 shaıba jiberdi.
Endi aldaǵy tórt kezdesýin astanalyqtar óz muz aıdynynda ótkizedi. Tarqatyp aıtsaq, 12 qyrkúıekte Nıjnekamskiniń «Neftehımıgin», 14 qyrkúıekte Tómengi Novgorodtyń «Torpedosyn», 16 qyrkúıekte Qazannyń «Aq Barsyn» jáne 18 qyrkúıekte Ombynyń «Avangardyn» qabyldaıdy.
Ǵalym SÚLEIMEN,
«Egemen Qazaqstan»