Búgin QR Premer-Mınıstri Baqytjan Saǵyntaev Pavlodar oblysyna jumys sapary aıasynda Ekibastuz qalasyndaǵy №36 orta mektepke bardy, onda jergilikti mektepterdiń qamqorshylar keńesterimen, ata-analar komıtetterimen kezdesip, bilim berý júıesin damytýdyń ózekti máselelerin talqylady. Bul — bilim berý sapasyn arttyrý, oqý materıaldarymen qamtamasyz etý, materıaldyq-tehnıkalyq bazany jaqsartý, sıfrlandyrý jáne t.b.
№36 jalpy bilim berý mektebi 2016 jyldan bastap jumys isteıdi. Qazirgi tańda mektepte 916 bala bilim alýda. Mekteptiń pedagogter quramy 53 muǵalimnen turady. Kabınetter qajetti jabdyqtarmen jaraqtandyrylǵan. Zamanaýı oqý prosesiniń jańa tásilderin eskere otyryp, robotty tehnıka jáne shahmat kabınetteri ashylǵan.
Premer-Mınıstr AT-kabınetterdi aralady, onda pedagog B. Belgibaeva «О́z bolashaǵyńdy baǵdarla» pılottyq jobasynyń iske asyrylýy jaıynda málimdedi. О́z kezeginde, oqýshy A. Amangeldi ınteraktıvti taqtada ózi ázirlegen, aǵylshyn tilindegi anımasııalyq jobamen tanystyrdy.
Mekteptiń akt zalynda Baqytjan Saǵyntaev jergilikti mektepterdiń qamqorshylar keńesteri men ata-analar komıtetterimen kezdesti. Kezdesýge qatysýshylar bilim berý júıesindegi problemalarǵa qatysty óz oılaryn ortaǵa salyp, bilim berý qyzmetteriniń sapasyn kóterý týraly usynystaryn bildirdi.
№18 mekteptiń ókili A. Armangúl birinshi synyp oqýshylaryn memlekettik tilindegi oqytý materıaldarymen qamtamasyz etý máselesin kóterdi. №2 mekteptiń atynan N. Qosdáýletova oqytý oryndarynyń ınfraqurylymyn odan ári damytý máselesin tilge tıek etti. №17 mektep ókili S. Aqnurova aralas mektepterdiń jumysyn jetildirý jaıyn qozǵady. V. Kolodıýk (№35 mektep) — áleýmettik pedagogtar, mektep psıhologtary men ádiskerlerdiń jalaqysyn kóterý máseleleri týraly aıtty. №22 mektep ókili Q. Kókimbaeva Ulttyq biryńǵaı testileý sertıfıkatynyń qoldanylý merzimin uzartý máselesin kóterdi. №10 mektepten kelgen V. Potrahına bilimdi baǵalaý júıesine usynys bildirdi. №21 mektep ókili S. Berteneva bes kúndik oqý aptasyna kóshý arqyly oqýshylardyń júktemesin azaıtý týraly suraq qoıdy. Sh. Aqmýrzına óńirde mektepterdiń bazasynda qosymsha uzartylǵan kishi synyptar ashý máselesin kóterdi.
Jıyn qatysýshylarynyń suraqtaryna Premer-Mınıstr B. Saǵyntaev pen bilim jáne ǵylym mınıstri E. Saǵadıev jaýap berdi. Osyndaı ashyq áńgimelesý máselelerdi anyq aıqyndaýǵa jáne olardy sheshýdiń tıimdi joldaryn tabýǵa jol ashady. Talqylaý qorytyndysy boıynsha oblys ákimdigine jáne Bilim jáne ǵylym mınıstrligine aıtylǵan usynystar men kóterilgen máseleler boıynsha naqty tapsyrmalar berildi.