Parlament Senaty Tóraǵasynyń orynbasary Bektas Beknazarov Astanaǵa kelgen Atyraý oblysynyń bir top ardagerlerimen kezdesti, dep habarlady Senattyń baspasóz qyzmeti. Halyq sharýashylyǵy men ekonomıkanyń ár salasynda eńbek etip, elimizdi kórkeıtýge atsalysqan atyraýlyq ardagerler elordaǵa saıahattap kelgen bolatyn.
Senat Tóraǵasynyń orynbasary B.Beknazarov kezdesýdi asha kelip, búgingi tańda depýtattar korpýsynyń atqaryp jatqan jumystary týraly habardar etti. Sondaı-aq elimizdiń damý qarqyny men jetistikteri týraly aıta kelip, qazirgi zamanda mańyzdy máselelerdiń biri – urpaq tárbıesi týraly óz oılaryn ortaǵa saldy. Bul rette Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynan týyndaıtyn mindetter aıasynda el bolashaǵy tárbıeli urpaqtyń qolynda ekeni atap ótildi. Urpaq tárbıesi ekonomıkalyq mol tabystar men tehnologııalyq órkendeýdiń tasasynda qalatyn bolsa, ol qoǵam úshin eleýli qaýipterdiń birine aınalady. Qoǵam órkenıetke qaraı damyǵan saıyn rýhanı quldyraýdyń da qateri baıqalady. Tóraǵa orynbasary turaqtylyq saqtalmaǵan elderdegi bosqynshylyqty mysalǵa ala otyryp, búgingi urpaqty el táýelsizdigine zııandy ártúrli qaýipti qaterlerden saqtandyrý qajettigin atap ótti.
Kezdesý barysynda Qatımolla Rızýanov, Baqtybek Taýbaev, Nurmuhan Tańbaı, Mádına Ǵabdisálimova jáne taǵy basqa ardagerler sóz alyp, óz oılaryn ortaǵa saldy. Senattyń Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev ta jastar tárbıesi týraly pikirin bildirdi.