Tamyz aıynyń sońǵy kúnderi tolassyz jaýǵan jaýyn bitik ósken astyqty oryp, bastyrýǵa birshama qolbaılaý týǵyzyp edi, qońyr kúz jaıma-shýaqtyq tanytyp tur. Dıqan qaýymyna keregi – osy, aýa raıynyń qolaıly bolýy. Sál-pál baıaýlap qalǵan naýqan qaıtadan qyzyp sala berdi. Qazir esh kidiris joq. 4,2 mıllıon gektar alqaptyń ónimderin jınap alýǵa 10 myńǵa jýyq ártúrli markaly tehnıkalar jumyldyrylǵan. Janar-jaǵar maı, jumys kúshi jetkilikti. Aıyrtaý aýdanyna barǵan jumys saparynda oblys ákimi Qumar Aqsaqalov bıdaı tanaptarynyń ár gektarynan 62,5 sentner el rızyǵy jınalyp jatqan alqapty aralap, kúzgi oraqtyń barysymen tanysty. Burynǵy rekord 55 sentner bolsa, bıyl jańartylyp, kórsetkish 7,5 sentnerge asyp túsken. Osyndaı mol ónimge qalaı qol jetkizdińizder degen saýalǵa «Babyq-Burlyq» JShS-niń dırektory Seıilbek Mahmetov Jer-anany mápelep kúte bilse, jomarttyǵynda shek joq dep qysqa ǵana jaýap qaıyrdy. Sózge sarań, iske myǵym eńbek adamyna tán qasıet dersiń.
О́ńir basshysy Qyzyljar, Esil aýdandarynyń egis tanaptaryn aralaý kezinde babyqburlyqtardyń tájirıbesin úlgi etti. Memleket agrarlyq salaǵa júıeli qoldaý kórsetip keledi. Eńbekaqynyń ósýi, basqa da áleýmettik kórsetkishterdiń jaqsarýy astyq óndirisiniń rentabeldiligine tikeleı baılanysty. Jumys nátıjeligi jergilikti bılikten de suralady.
Rasynda da, Tómengi Burlyq aýylynyń turǵyndaryna barlyq jaǵdaı jasalǵan. Ortasha eńbekaqy 115 myń teńgeni quraıdy. Bıyl ár úıge ortalyqtandyrylǵan jylý júıesi tartylyp, jumysshylarǵa arnalǵan baspanalar salynýda. «Syrymbet–1» agroqurylymynyń basshysy Manat Ǵabdýllınniń aıtýynsha, bıyl ónim óte berekeli. 6 myń gektar alqaptyń úshten birine maıly daqyldar sebilipti. Gektar berekesi 18 sentnerge jeteǵabyl.
Aıyrtaý – iri astyqty aýdandardyń biri. 370 myń gektar jerdiń ónimin jınap alý úshin barlyq múmkindik qarastyrylǵan. Iri qara maly 52 myń basqa jýyqtaıdy. «Moldekenov» sharýa qojalyǵynyń basshysy Jomart Moldekenov tabyndy molaıtý maqsatynda jeńildikpen 10 mıllıon teńge nesıe rásimdepti. Elordalyq kásipker Nurlan Muhamedjanov sútti baǵyttaǵy sımmental sıyryn ósirýmen aınalysady. Endi 200 bas qazaqtyń aqbas sıyrlaryn satyp almaqshy. Oıy – 17 turǵyny ǵana bar Krasnogorka aýylyn túletý. Bul úshin jylyjaı, turǵyn úı salyp, ońtústik jaqtan qonystanýshylardy kóshirip ákelmek.
Aýdan aktıvimen ótken jıynda 280-ge jýyq sharýashylyqtyń birsypyrasy mıneraldy tyńaıtqysh qoldanbaıtyny, sýbsıdııanyń tıimdi paıdalanylmaıtyny aıtyldy. Mal basy men jalaqyny arttyrý, et, sút ónimderiniń eksportyn ulǵaıtý tıisti oryndarǵa tapsyryldy.
О́ńir boıynsha dándi daqyldardyń jartysynan astamy bastyrylyp, ortasha ónimdilik 15 sentnerden aınalýda.
О́mir ESQALI, «Egemen Qazaqstan» Soltústik Qazaqstan oblysy