«Samuryq-Qazyna» ulttyq ál-aýqat qorynyń basshysy Ahmetjan Esimov ıtalıandyq «Eni» munaı-gaz kompanııasynyń ókilderin qabyldady. Taraptar kelesi baǵyttar boıynsha yntymaqtastyqtyń perspektıvalaryn talqylady: gaz óńdeý zaýytyn salý, Kaspıı teńizindegi Isataı jáne Abaı ken oryndarynda jer qoınaýyn paıdalaný, sondaı-aq qaıta qalpyna keletin qýat kózderin damytý.
«Eni» kompanııasynyń barlaý jáne óndirý jónindegi dırektory Antonıo Vella dál qazirgi ýaqyt «Qarashyǵanaq» jobasyn damytýǵa qolaıly ekendigin atap ótti.
«Búginde álemde munaı óndirý kóleminiń tómendeýimen qatar onyń baǵasy qymbattaǵany baıqalyp otyr. Biz muny paıdalanýymyz qajet. Bizdiń kompanııa qazaqstandyq jobalardy ınvestısııalaýdy belsendetýdi josparlap otyr», - dep atap ótti A. Vella.
Kezdesý barysynda «Eni» kompanııasynyń ókilderi ıtalıandyq kompanııa Qazaqstanmen jasyl energetıkany damytý salasynda da yntymaqtastyq ornatýǵa qyzyǵýshylyq bildiretinin atap ótti. Búginde taraptar Aqtóbe oblysynda jel elektr stansııasyn salý jáne Jambyl oblysynda «Býrnoe» kún elektr stansııasyn ınvestısııalaý boıynsha kelissózder júrgizýde.
Sonymen birge taraptar Qarashyǵanaq jobasy boıynsha 2012 jyldan beri jalǵasqan daýdy retteý máselesindegi ilgerileýdi atap ótti. Antonıo Vella Ahmetjan Esimovke atalǵan másele boıynsha qabyldanǵan ózgeristerge alǵysyn bildirdi. Bıylǵy jyldyń qarasha aıynda Joba boıynsha daýdy retteý týraly kelisimge qol qoıý josparlanyp otyr.