Alǵash ret ashylǵan ınternet-dúken ortalyǵynda taýardy qabyldaý men óńdeýden bastap, býyp-túıý, saqtaý jáne ony ıelerine jetkizý sekildi qyzmet túrleri bar.
Qazposhtanyń Astanada alǵash ret ashylǵan kezekti jobasy kəsipkerlerdiń taýardy ıesine jetkizýin jeńildetedi. Odan bólek, qoımalarmen, baılanys ortalyqtarymen, logıstıka jəne qyzmetkerler quramymen qamtamasyz etý shyǵynyn azaıtýǵa múmkindik bermek.
Elimizdegi elektrondy saýdany damytýdyń 2018-2020 jyldarǵa arnalǵan jol kartasynda osyndaı ortalyqtardy ashý josparlanǵan bolatyn.
− Internet-saýda mádenıetiniń damýymen qatar, qazaqstandyqtardyń ony jetkizip berýge degen talaby da artty. Qazir biz jetkizý merzimderin qysqartý boıynsha jumys júrgizip jatyrmyz. Halyqaralyq kýrerlik jáne logıstıkalyq kompanııalarmen, poshta operatorlarymen yntymaqtastyq ornattyq. TMD-da birinshi bolyp 2017 jylǵy tamyzda QHR-dan Qazaqstanǵa temir jolmen sálemdeme tasymaldaýdy jolǵa qoıdyq. Bul jetkizý merzimin 2 ese (60 kúnnen 25 kúnge deıin) qysqartty, jetkizý qunyn da 2 ese arzandatyp, tasymaldyń turaqtylyǵyn arttyrdy. Temir jol baǵytynan ózge biz QHR-dan Qazaqstanǵa charterlik áýe tasymalyn iske qosý jumystaryn júrgizip jatyrmyz. Bul jetkizý merzimin 25 kúnnen 7-15 kúnge deıin qysqartýǵa múmkindik beredi. Sondaı-aq halyqaralyq tranzıtti damytý josparynda bondtyq qoımalardy qurý belsendi túrde júzege asyrylýda, – dedi «Qazposhta» AQ Basqarma tóraǵasy Sáken Sársenov.
Qazir jalpy aýdany 3 myń sharshy metrlik qoımada 20 ınternet-dúkenniń 600 myń taýary saqtalǵan, bıyldyń ózinde qoımadan 177 myń taýar jóneltilip otyr.
Alǵashqy fýlfılment-ortalyqtyń ashylýyna Premer-mınıstrdiń orynbasary Asqar Jumaǵalıev qatysyp, ınternet-dúkenniń jumysymen tanysty.
− Shaǵyn jəne orta kəsipkerlikti Elbasynyń ózi qoldap otyr. Sonyń negizinde Salyq kodeksine ózgerister engizildi. Atalǵan ózgeristerge səıkes kəsipkerlerdiń salyq tóleýi jeńildedi. Onyń elektrondy saýdaǵa da qatysy bar. Sondyqtan Úkimet sizderden nətıjeli jumys kútedi. Eń bastysy, el ekonomıkasyn damytýda jańa jumys oryndarynyń ashylýy qýantarlyq jaǵdaı, – dedi A.Jumaǵalıev.
Aıta keterligi, elimizdegi ınternet-satyp alýshylardyń sany ótken 7 aıda 1,5 mln adamǵa jetken. Bul byltyrǵymen salystyrǵanda 11 prosentke artyq. Elektrondy saýda naryǵynyń ilgeri jyljýyna fýlfılment ortalyqtarynyń ashylýy da oń yqpal etpek.
Erkejan AITQAZY, «Egemen Qazaqstan»