Taran aýdandyq máslıhatynyń turaqty komıssııasy músheleriniń birlesken otyrysynda bolshevık Lavrentıı Taran atyndaǵy aýdan men selo atyn ózgertý talqylandy.
Májiliske depýtattarmen birge qoǵamdyq jáne úkimettik emes uıymdar ókilderi, Taran selosynyń turǵyndary, barlyǵy 333 adam qatysty. Otyrysta aýdan ákimi Qýandyq Ispergenovtyń ótinishi boıynsha aýdan atyn Beıimbet Maılın dep ózgertý týraly másele jóninde 14 adam sóıledi. Onyń bireýi ǵana «Taran Amangeldimen birge halyq baqyty úshin baılarǵa qarsy kúresken, sondyqtan tarıhty umytýǵa bolmaıdy» degen oı aıtty. Qalǵandary saıası qýǵyn-súrgin qurbany bolǵan jazýshy Beıimbet Maılınge laıyqty qurmet áli tolyq kórsetilmeı keledi, sondyqtan týǵan jerindegi aýdandy onyń esimimen ataý óte laıyqty ekenine qoldaý bildirdi.
Al sheshim shyǵarýǵa tek aýdan máslıhatynyń depýtattary ǵana qatysty. Olardyń barlyǵy Taran aýdanynyń atyn Beıimbet Maılın atyna ózgertýge daýys berdi. Endi ol respýblıkalyq onomastıka komıssııasyna jiberiletin bolady. Al Taran atymen atalatyn aýdan ortalyǵyn sol jerdegi ózen atymen Áıet dep ataýǵa pátýalasty. Bul onyń tarıhı ataýy da bolatyn. Ol da onomastıka komıssııasyna jiberiledi.
Názıra JÁRIMBET,
«Egemen Qazaqstan»
Qostanaı oblysy