О́tken demalys kúnderi Almaty tennıs klýbynyń Gorky Tennis Park korttarynda áýesqoı jáne balalar tennısin damytýǵa baǵyttalǵan dástúrli jarys ótti. Sporttyq sharany ForteBank jáne Gorky Tennis Park uıymdastyrdy.
Bıylǵy bul týrnırge qatysýshylar qatary kóp boldy. Týrnır eki sanatta ótti: erler jeke razrıady jáne juptyq razrıad (Pro-Am mix). Alǵashqysyna 29 tennısshi qatyssa, kelesisinde áýesqoı erler men kásipqoı qyzdardyń on eki juby baq synasty.
Tennıs básekesiniń juldyzdy qatysýshysy retinde Sergeı Shahvorostovty aıtýǵa boldy. Kásibı sportshy shóptegi hokkeıden úlken jetistikterge jetken. Almatylyq «Dınamomen» birge segiz ret KSRO chempıonatyn jeńip, eki ret KSRO Kýbogynyń ıegeri atandy, odaq quramasymen birge 1988 jylǵy Olımpıadaǵa qatysty. Sol tusta ol tennıspen áýestenedi, nátıjesinde hokkeıshi Shahvorostov mansabyn aıaqtaǵannan keıin áýesqoı tennıs týrnırlerinde óner kórsete bastady. Qazir Sergeı Konstantınovıch – Almatynyń eń ataqty oıynshylarynyń biri. «Árıne, men ForteOpen-de jeńýge nıettimin, jeńe almasam da ókinbeımin. Men úshin eń bastysy – ýaqytty jaqsy ótkizý, bir aptaǵa qýat alyp, sergý jáne dostarymen kezdesý», dedi Shahvorostov jarys aldynda.
Jarystaǵy kásibı tennısshiler arasyndaǵy eń tanymal qatysýshy qyrǵyzstandyq 28 jasar Ksenııa Palkına boldy. Ol osydan bir apta buryn Shymkent qalasynda ITF serııasynda jeńiske jetip, 36 dúrkin «fıýcherstiń» chempıony atanǵan. «Men úshin ForteOpen – bedeldi týrnır, sondyqtan men osymen úshinshi jyl qatarynan óner kórsetip jatyrmyn. Áýesqoılarmen de, kásipqoılarmen de oınaý óte qyzyqty. Munda tamasha atmosfera qalyptasqan, jaqsy adamdar bar», dep aǵynan jaryldy K.Palkına. Ol ForteOpen-nen keıin Úndistandaǵy WTA serııasynyń týrnırinde óner kórsetedi, sodan keıin ony Fransııa kútýde, onda birneshe «fıýcherster» ótedi.
Jarystan túsken barlyq qarajat balalar tennısin damytýǵa jumsalady. Qysta úlken tennıspen kásibı aınalysatyn balalarǵa arnalǵan respýblıkalyq týrnır ótpek. «Bizdiń qyzmetimizdiń mańyzdy quramdas bóligi áleýmettik jobalardy, sonyń ishinde balalar sportyn damytýǵa baǵyttalǵan jobalardy qoldaý bolyp tabylady. Tennıs týrnırlerin ótkizý biz úshin jaqsy dástúrge aınaldy: ForteBank Open 3 týrnıri – bizge kóptegen jaǵymdy emosııalar syılaǵan jarqyn sporttyq oqıǵa», deıdi ForteBank basqarma tóraǵasy Gýram Andronıkashvılı.
Tartysty ótken tennıs oıynynyń nátıjesine kelsek, kásibı sheberler arasynda birinshi oryndy Dmıtrıı Dmıtrıev ıelendi. Ekinshi oryndy Muhtar Janseıitov enshilese, Mırsaıd Mırdjalıev úshinshi tuǵyrdan kórindi. Al áýesqoılar arasynda Ahmet Ýmarov top jarsa, Jan Benıatınov pen Vasılıı Popov ekinshi, úshinshi oryndardy óziara bólisti.
Kásibı sheberler arasyndaǵy juptyq saıysta Iýı Konstantın men Darıa Berejnaıa birinshi orynǵa qol jetkizse, Gýram Andronıkashvılı men Ksenııa Palkına ekinshi oryndy enshiledi. Úshinshi oryn Anton Komenko men Iаna Sızıkovaǵa buıyrdy. Áýesqoılar arasyndaǵy juptyq jarysta Denıs Valetov pen Larısa Bekmetova úzdik dep tanyldy. Islam Djeksenov pen Asel Týzelbekova ekinshi oryndy, Rýstem Bektýrov pen Ekaterına Dmıtrıchenko úshinshi oryndy ıelendi.
Álı BITО́RE,
«Egemen Qazaqstan»