«Astana aspany» atty «Positive» qysqametrli fılmder festıvali ótti

Bas qalanyń 20 jyldyq mereıtoıyna oraı arnaıy uıym­das­tyrylǵan jas kınogerler baı­qaýyna 10 rejısser tańdalyp aly­nyp, úzdik jumystar «Qazy­ǵurtfılm» kınostýdııa­synda taspalandy. Jobanyń bas pro­dıýseri – Qazaqstannyń eń­bek sińirgen qaıratkeri Sábıt Ábdi­halyqov. Kórkemdik talap tur­ǵysynan baǵalap, saraptaǵan – kı­norejısser, Qazaqstan Res­pýb­lıkasynyń eńbek sińir­gen qaıratkeri Satybaldy Narym­betov bastaǵan kınematografııa salasynyń kásibı mamandary. 

«Bul festıvaldy uıymdas­tyrýdaǵy eń basty maqsat – ta­qy­ryp óz aldyna, jastardyń jul­dyzyn jaǵyp, kıno ále­mine 10 jańa esim ákelgimiz kel­di. Kóptegen jastarymyz ha­lyq­aralyq baıqaýlarǵa qa­tysyp, júldeli oralyp júr. Biraq ókinishke qaraı, ol jumys­tardyń barlyǵy avtorlyq kı­no – arthaý­s baǵytynda túsi­rilgendikten, kınoteatrlarda kóp kórsetile bermeıdi. Kó­rermen men kınogerler arasynda kópir bolsaq degen usy­nysymyzdy Mádenıet jáne sport mınıstri Arystanbek Mu­hamedıuly qýana qoldap, jastardyń shyǵarmashylyq tynysyn sezinip, qııal-qarymyn aıqyndaýǵa tamasha múmkindik aldyq», deıdi festıvaldyń bas sarapshysy, belgili kınorejısser Satybaldy Narymbetov. 

10 rejısser Astana qala­syna qatysty ór­bıtin on túrli taqyrypty qoz­ǵap, sýret­ker­lik qııal-qarymy men kásibı she­berlikterin sarap­shylar tal­qysyna usyndy. Olar­dyń qatarynda: Maqsat Ospa­novtyń «Astana aspany», Samat Álim­niń «Sarbaz», Elena Lısa­sına­nyń «Qazyna», Aıdyn Saha­mannyń «Baqyt bıi», Ardaq Tóleýbaıdyń «О́zbek quda», Beksultan Ánýarov­tyń «Altyn balyq», Aıgúl Aqsam­bıevanyń «Iа tebıa slyshý», Rýstam Otar­shın­niń «Chemodan», Safýan Shaı­­merdenovtiń «Nurly jolda» jáne Jandos Qusaıynovtyń «Qut­ty qonaq» qysqametrli kar­tı­nalary bar. «Positive» qys­qa­metrli fılmder festı­vali baǵ­darlamasyna engen 10 kar­tınanyń 6-aýy komedııa janryn­da túsirilse, 4 týyndy dra­­­malyq sıý­jetke qurylypty. Atal­ǵan fılmderdegi basty ról­der­­di Jal­ǵas Tolǵanbaı, San­jar Má­dıev, Ernar Jumataev, Ja­nar Maqasheva, Ábilmansur Se­ri­kov, Aqmaral Tanabaeva bas­ta­ǵan otandyq akterlermen qatar, О́z­beks­tannyń halyq ártisi Murat Rad­jabov, Reseıdiń halyq ártisi, teatr jáne kıno akteri Iýrıı Kýznesov, reseılik tanymal kı­no­aktrısa Olga Kýzmına, talant­ty qy­rǵyz akteri Ázız Beı­shenálıev jáne taǵy basqa óner maıtalmandary keıiptedi. 

«Rejısserler jumysy negi­zinen As­ta­nanyń eń bir kórik­ti, pozıtıvti sátteri sýret­teletin kórinisteri men sáýletti de sándi arhıtektýrasyn, jalpy bas qalamyzdyń búgingi rýhanı tynysyn kórkem tilde, ıaǵnı kıno tilinde beıneleýge baǵyttaldy. Adamdy erekshe áserge bólep, kóterińki kóńil kúı syılaıtyn ssenarıılermen jumys jasadyq. Ár fılmniń aıtar oıy men qamtıtyn sıýjeti bólek bolǵanymen, barlyǵyna ortaq maqsat bireý. Ol – eldi­gi­mizdi, eńseli elordamyzdyń je­tis­tikterin dáripteý», deı­di joba prodıýseri Sábıt Ábdi­halyqov. 

Ras, qysqametrli fılm – rejısser sheberliginiń shyń­dalyp, shyǵarmashylyq qııal múmkindiginiń naǵyz synalar tu­sy. Uzaqtyǵy 2 saǵatqa sozylatyn fılmderdegideı emes, bul jerde aınaldyrǵan 15 mınýt ýaqyttyń ishine barlyq aıt­qyń kelgen oıdy syǵymdap syıdyryp, kıno tilin­degi yqsham ǵana, biraq kór­kemdik qýaty tolyq­metrli kartınalardan tıtteı de kem emes dúnıe týdyrý. 

Bas shahar tórindegi «Qazaq­stan» Or­talyq konsert zalynda kór­setilgen 10 túrli taqyrypta tú­sirilgen dál sonsha fılmdi kó­rip, alýan oıdyń jetegine erip, kórer­men zalynan túsiniksizdeý sezimde shyqqanymyz sondyqtan bolsa kerek. Bul festıvalda da saýatty, oqıǵany shytyr­man sıýjetke qura alatyn ssenarııs­ter tapshylyǵymen betpe-bet keldik. Astana degende san­aý­­­ly ǵana sıýjettiń aınalasy­na to­qaılasqan fılmderde oqıǵa kóp, biraq adamnyń kó­­ńi­lin qozǵap, jan dúnıesin álem­­­tapyryq kúıge bóleıtin te­reńdik, este qalarlyq dıalog az. Áıtse de bizdi qýant­qany – qazaq kınosyndaǵy sondaı bir olqylyqtardyń ornyn toltyrýǵa baǵyttalyp «Positive» festıvali sekildi aýqym­dy joba­lardyń qolǵa alynýy. Atal­ǵan kıno­baıqaý arqyly óner álemi bolashaqta qazaq kınosynyń týyn kókke kóteretin jańa esim, tyń talpynystarmen tanysty. Árıne alǵash ret uıymdastyrylyp, tuńǵysh ret dodaǵa túsip turǵannan keıin de keıbir tusta kemshiliktiń ketip jatýy zańdylyq jáne ol qaýip emes. Bastysy – fılm tú­­­si­rýge, keıipkerlerin kıno ti­lin­de sóıletýge baǵyttalǵan tal­­­py­­nystyń, alǵashqy qadam­nyń jasalǵany. «Positive» fes­tıva­liniń basty pozıtıvi de osynda bolsa kerek, bizdińshe. 

Hosh, sonymen ómir shyn­dyǵyn óner bıiginde bederleýge talpynǵan túrli deńgeıdegi ju­mystardy saralaı kele, mamandar qatysýshylardy arnaıy atalymdar boıynsha marapattady. 

«Úzdik fılm» júldesine Aı­gúl Aqsambıevanyń rejısser­lik qoltańbasynda kórermenine jol tartqan «Iа tebıa slyshý» fıl­miniń ujymy ıe boldy. «Úz­dik akter» atalymyndaǵy syı­­lyq – О́zbekstannyń halyq ár­tisi Murat Radjabovqa bu­ıyr­sa, Ǵ.Músirepov atyndaǵy aka­demııalyq balalar men jas­óspirimder teatrynyń aktrısasy Janar Maqasheva «Úzdik aktrısa», «Iа tebıa slyshý» fılminiń akteri Vıllı Pylkov-Vaıdman «Ekinshi plandaǵy úz­dik akter» atandy. Sonymen qatar sarapshylar alqasynyń she­shimimen «Eń úzdik rejısserlik jumys» – «Sarbaz» fılminiń rejıs­seri Samat Álimge, «Eń úzdik operatorlyq jumys» – «Iа tebıa sly­shý» kartınasynyń operatory Rınat Qosanǵa, «Eń úzdik ssenarıı» – «Astana aspany» fıl­miniń ssenarıı avtory Nur­­jan Tutovqa, «Eń úzdik po­zıtıvti fılm» – Beksultan Ánýa­rovtyń «Altyn balyq» týyn­dysyna, «Eń úzdik montaj» – Rýstam Otar­shınniń «Chemodan» kartına­syna, «Eń úzdik sýretshi» atalymyndaǵy júlde – «Qutty qonaq» fılminiń sýretshisi Erken Súleımenovke, «Eń úzdik grım» atalymyndaǵy syılyq «Astana aspany» fılminiń grım­deýshi mamany Danııar Sa­dyǵulovqa tabystaldy. Budan bólek, «Qazylar alqasynyń arnaıy syılyǵy» – Aıdyn Sa­hamannyń «Baqyt bıi» kartınasyna, al debıýttik jumysy úshin «Arnaıy syılyq» «Nurly jolda» fılminiń rejısseri Safýan Shaımerdenovke berildi. Sondaı-aq sheteldik qonaq akterler Iýrıı Kýznesov, Vladımır Moıseenko, Azız Beıshenálıev, Azamat Nyǵmanovqa uıym­das­tyrýshylar tarapynan arnaıy syılyqtar tabys etildi. Ma­rapattaý rásiminiń sońynda fes­­tıvaldyń qurmetti qonaǵy bol­ǵan Qazaqstannyń Eńbek Eri, KSRO jáne Qazaqstannyń halyq ártisi Asanáli Áshimov jas kı­noger­lerge sáttilik tilep, aq bata­syn berdi. 

Nazerke JUMABAI, 

«Egemen Qazaqstan»