"Astana" Eýropa lıgasynda fransııanyń "Renn" komandasyn jeńdi. Esep 2:0.
Eýropa lıgasynyń toptyq kezeńine tórtinshi jyl qatarynan shyqqan el chempıony astana abyroıymyzdy asqaqtatty. Alǵashqy oıynda otandyq komanda "Dınamo" komandasymen Kıevtegi oıynda teń túsip, 1 upaı enshilegen edi. Endi bul joly fransııanyń ortańqol ujymyn tizerletti. "Astana-Arenaǵa" jınalǵan 25 myń jankúıer taǵy bir jeńistiń kýási boldy. Aldymen buryshtama kezinde Bahtıer Zaınýtdınov gol soqty. Oıynnyń sońyna qaraı qaqpashymen betpe-bet shyqqan Marın Tomasov esepti eseledi. 2:0.
Grıgorıı Babaıan, "Astana" bapkeri: - Qazaqstan chempıonatynda jyldamdyqtar basqasha. Sondyqtan da, osy oıynnyń sońynda biz qatty sharshadyq. Tipti, Zaınýtdınov sharshaǵanyn bildirtip, óziniń almasqysy keletinin bildirtti. Degenmen, búkil Qazaqstandy jeńispen quttyqtaımyn.
Sabrı Lıamýshı, "Renn" bapkeri: - Qazaqstan óte shalǵaıda eken. Biz uzaq jol júrdik. Sodan da bolar, oıynǵa tyńǵylyqty daıyndalyp úlgermedik. Oıynda bolǵan múmkindikterimizdi paıdalana almadyq. Dáldik jetispedi. "Astana" bolsa kerisinshe, bar múmkindigin golǵa aınaldyrdy.
Osy oıynda alǵan 3 upaıdyń arqasynda "Astana" óz tobyndaǵy birinshi orynǵa shyqty. Sebebi, "Dınamo" Kıev komandasy syrt alańda chehııanyń "Iаblones" degen komandasymen teń tústi. Negizi oıyn barysynda 2:0 esebimen jeńip jatqan ýkraınalyqtar qaqpalaryna 2 dop jiberip aldy. Demek, qazir ekinshi orynda 3 upaıy bar "Renn" tur degen sóz.
Endi Grıgorıı Babaıan shákirtteri 25-qazan kúni syrt alańda chehııanyń "Iаblones" klýbymen kezdesedi. Jalpy týrnırlik kestege kóz júgirtsek, elordalyq klýbtyń kelesi kezeńge ótetin múmkindigi molaıa túskenin baıqaımyz. Qalǵan 4 oıynda 2 jeńis tirkesek nemese 3 teń oıyn oınasaq Eýropa lıgasynyń pleı-off satysyna shyǵýǵa múmkindik týady.
N Komandalar O U T J D U 1 ASTANA 2 1 1 0 4-2 4 2 RENN 2 1 0 1 2-3 3 3 DINAMO K 1 0 1 0 2-2 1 4 IаBLONES 1 0 0 1 1-2 0