Mentaldy arıfmetıka boıynsha eń uzaq matematıkalyq estafeta Álemdik rekordtar kitabyna engizildi. Bul týraly aqparatty «Habar 24» arnasy bólisti.
Aqtaý qalasynyń turǵyny, altynshy synyp oqýshysy Oryngúl Arystan mentaldy arıfmetıka boıynsha álemdik rekord ornatqan komanda quramynda bolǵan. 26 mınýt, 26 sekýnd jáne 12 mıllısekýndta balalar 30 myń esep sheshken. Saıys ekinshi Eýrazııalyq áıelder forýmy aıasynda Reseıde ótken, álemniń shartarapynan 150 oqýshy qatysqan.
Oryngúl Arystan mentaldy matematıkamen birneshe jyl boıy shuǵyldanyp júr. Arıfmetıkalyq esepterdi tez sheshý qabiletine baılanysty Oryngúldi janyndaǵylar «kalkýlıator qyz» dep atap ketken. Baıqaýǵa qatysý úshin bir aı boıy kúnine eki saǵattan daıyndalǵan. «Saıys birneshe kezeńnen turdy. Estafeta kezinde bir-birimizge qaryndash bere otyryp mysaldardy oryndadyq», deıdi O.Arystan.
Mentaldy arıfmetıka boıynsha oqytýshy Qarlyǵash Ábdiraıymova tarıhtaǵy eń uzaq matematıkalyq estafeta Álemdik jáne Azııalyq rekordtar kitaptaryna jazylǵanyn aıtady.
Al Oryngúl bolashaqta matematık emes, dáriger bolýdy armandaıdy. Bolashaq dáriger úshin jan-jaqty bolý eshqandaı kedergi keltirmeıdi dep oılaımyz.
Baǵashar TURSYNBAIULY,
«Egemen Qazaqstan»