«Astana Opera» teatrynyń kameralyq zalynda Álemdik jáne dástúrli dinder kóshbasshylarynyń VI sezin ótkizý aıasynda «Astana – Álem daýysy» halyqaralyq festıvaliniń saltanatty ashylý rásimi ótti.
Aıtýly óner oqıǵasy elordanyń 20 jyldyǵyna oraı Mádenıet jáne sport mınıstrliginiń qoldaýymen «Rýhanı jańǵyrý» baǵdarlamasy aıasynda tarıhı-mádenı muralardy saqtaý, damytý jáne nasıhattaý maqsatynda uıymdastyryldy. Keshtiń mándi de qyzyqty konserttik baǵdarlamasyn Mádenıet qaıratkeri, professor Gúlmıra Quttybadamova jetekshilik etetin Astana qalasy ákimdigi Memlekettik akademııalyq fılarmonııasynyń kameralyq hory usyndy.
Astana qalasynyń Memlekettik akademııalyq fılarmonııasy kameralyq horynyń negizi 2004 jyly qalanyp, óziniń 14 jyldyq tarıhynda Qazaqstan men odan tys aımaqtarǵa birneshe márte gastroldik saparǵa shyǵyp, kóptegen halyqaralyq mýzyka baıqaýlarynda jeńis tuǵyrynan kórinip júr. Atap aıtar bolsaq, olardyń qatarynda: «World Choir Games» baıqaýynyń qos altyn medali (Latvııa, 2014), «Shabyt-2014» halyqaralyq shyǵarmashyl jastar festıvaliniń bas júldesi (Astana), «Jubanov kóktemi-2012» halyqaralyq baıqaýynyń bas júldesi (Aqtóbe), «Haınývka» HHH halyqaralyq rýhanı mýzyka festıvaliniń bas júldesi (Polsha, Belostok, 2011), Beıjińdegi Búkilálemdik hor forýmynyń eki altyn kýbogy (Qytaı, 2011), «Astana – án qanatynda» festıvaliniń bas júldesi (Astana, 2008) jáne taǵy da basqa marapattar bar. Ujymnyń kórkemdik jetekshisi Gúlmıra Quttybadamova óziniń ustazy KSRO halyq ártisi, qazaqstandyq hor dırıjeri Anatolıı Molodovtyń dástúrin laıyqty túrde jalǵastyra otyryp, árdaıym hor mýzykasyn oryndaýda joǵary shyǵarmashylyq deńgeıdi baǵyndyryp keledi.
Bas shahardyń mádenı-rýhanı ómirin órkendetýge ólsheýsiz úles qosyp kele jatqan jas ta bolsa jasampaz óner ujymynyń Álemdik jáne dástúrli dinder kóshbasshylarynyń VI sezi aıasynda ótken «Astana – Álem daýysy» halyqaralyq festıvaliniń ashylý saltanatyna arnalǵan konserttik baǵdarlamasyna otandyq jáne álemdik hor mektepteri sheberleriniń úzdik týyndylary men zamanaýı óńdeýdegi halyq ánderi enipti. Abaıdyń «Kózimniń qarasy», Aqan seri Qoramsaulynyń «Qaratorǵaı», E.Astatýrovtyń óńdeýindegi P.Chaıkovskııdiń «Shelkýnchık mix» jáne saz áleminiń taǵy da basqa úzdik týyndylary aıtýly keshtiń kórigin kirgizip, talǵampaz mýzyka jankúıerlerine esten ketpes óner dýmanyn syılady.
Nazerke JUMABAI,
«Egemen Qazaqstan»