Kókshetaý – Astana tas jolynyń Makınsk qalasy mańynan óter tustyń oń qaptalynda da, sol qaptalynda da tabıǵattyń tamasha tartýy – jemis-jıdekterdi qysy-jazy satatyndar bar. Jol túskende kórip júretinbiz. Osy joly ádeıilep at basyn iriktik.
Sóreleri syńsyp tur eken. Ne joq deısiz. Alýan túrli jıdek tosaby. Tańqýraı, qaraqat, shıe, jıdek, búldirgen... Sańyraýqulaqtyń túr-túri. San alýan bal. Altaıdiki, ózimizdiki. Ittiń, borsyqtyń, sýyrdyń, qasqyrdyń maılary. Tipti monshaǵa qajetti qaıyń japyraǵyna deıin bar. Shelek-shelek kartop, sábiz, qyryqqabat.
Jomart tabıǵattyń jaqsylyǵyn kórip júrgendermen az-kem tildestik. Aıtýlaryna qaraǵanda, negizinen ózderi daıyndaıdy eken.
– Jazdyń kúni jemis-jıdek pisken kezde uıqy-kúlkiden aıyrylamyz,–deıdi Oksana Osıpova. – Masa-sonaǵa jem bolyp, kún saıyn jıyrma-jıyrma bes shaqyrym jol júrip, orman ishin kezemiz. Máselen, eki shelek jıdek terip ákeldiń deıik, kúnimen jumys istegendikten eki qolyń saldyrap qalady. Álgi jıdekti qabyǵynan, shóp-shalamynan tazalaýdyń ózi bir qııamet. Sosyn ony ýaqytynda qaınatyp alý kerek. Qanshama qant qajet, ońaı eńbek emes.
Sórelerdiń janynda turǵan satýshylardyń aıtýyna qaraǵanda, dárýmeni mol, suranysqa ıe ań-qustyń maıyn reseılikter ákelip kóterme baǵamen ótkizedi eken. Al jemis-jıdek pen sańyraýqulaqtyń deni bereke tunǵan Bulandynyń qalyń ormandarynyń ishinde jatqan ıen tegin nesibe.
– Negizinde óz jumysym bar, – deıdi Anna Petrova. – Bos ýaqytymda osymen aınalysamyn. Nesi bar, adal eńbek, salyǵyn tóleımiz. Kúnine tórt-bes myń teńge tapsam da olja emes pe? Qazir onsha ótpeı tur. Jazda Býrabaıǵa týrıster aǵylǵan kezde alýshylar kóp bolady. Bıyl jolaýshy kóp boldy. Shamasy týrısterdiń qarasy burynǵyǵa qaraǵanda molaıǵan tárizdi.
Shaǵyn bazar bolsa da, tirshiliktiń barometri tárizdi. Saryala kúzdiń sybaǵasyn molynan qarpyp turǵan, adal eńbekti násip etken satýshylar tabıǵattyń aýjaıyn ǵana emes, támam eldiń nazaryn aýdaryp otyrǵan týrızmniń tynysyn da tamyrshydaı sezinip otyr.
Bir aıta keterligi, satýshylardyń barlyǵy ózge ult ókilderi. Al alýshylar – kileń qazaqtar.
Baıqal BAIÁDIL,
«Egemen Qazaqstan»