Qazaq ádebıeti asa kórnekti jazýshysy, pýblısıst Sherhan Murtazadan aıyryldy. Alash armanyn tý qylǵan, ar-namysy aldaspannyń júzinde oınaǵan, eliniń erteńin oılaǵan tulǵanyń orny oısyrap-aq qaldy.
Sherhan Murtaza 1932 jyly 28 qyrkúıekte Jambyl oblysy, Jýaly aýdany, Myńbulaq aýylynda dúnıege kelgen. 1955 jyly M.V.Lomonosov atyndaǵy Máskeý memlekettik ýnıversıtetiniń jýrnalıstıka fakýltetin támamdaǵan. «Lenınshil jas» (qazirgi «Jas Alash») gazetiniń, «Sosıalıstik Qazaqstan» (qazirgi «Egemen Qazaqstan») gazetiniń tilshisi, ádebı qyzmetkeri boldy. 1963-1970 jyldary «Lenınshil jas» gazetiniń redaktory, «Jazýshy» baspasynyń, «Jalyn» almanahynyń, «Juldyz» jýrnalynyń bas redaktory, Qazaqstan Jazýshylar odaǵy basqarmasynyń ekinshi hatshysy, «Qazaq ádebıeti» gazetiniń bas redaktory ári Qazaqstan Jazýshylar odaǵy basqarmasynyń hatshysy, 1989-1992 jyldary «Egemen Qazaqstan» gazetiniń bas redaktory, 1992–1994 jyldary QR memlekettik teleradıo kompanııasynyń tóraǵasy bolyp istedi. QR Parlamentiniń Májilis depýtaty bolǵan. Jazýshynyń ár jyldary «Tabylǵan teńiz» (1963), «Belgisiz soldattyń balasy» (1969), «Ahmetjannyń anty» (1973), «Myltyqsyz maıdan» (1977) povesteri, «41-jylǵy kelinshek» (1972), «Internat nany» (1974) áńgimeleri, «Qara marjan» (1977), bes kitaptan turatyn «Qyzyl jebe», «Aı men Aısha» (1999) romandary, shyǵarmalarynyń tórt tomdyǵy (1990-2000), shyǵarmalarynyń 6 tomdyǵy, tańdamaly shyǵarmalarynyń 7 tomdyǵy, «Elim, saǵan aıtam, Elbasy, sen de tyńda» (K. Smaıylovpen birge) (1998), «Bir kem dúnıe» (2008) kitaptary jaryq kórgen.
Qazaq rýhanııatynda ult qalamgerleriniń uly mektebin qalyptastyrǵan, ádebıetimizdiń alyby, memleket jáne qoǵam qaıratkeri Sherhan Murtaza ómirden ozdy. Qaıtalanbas qaısar tulǵanyń týǵan eline, týǵan jurtyna qaraly týdy qushaqtap kóńil aıtamyz!
Mádenıet jáne sport mınıstrligi,
Qazaqstan Jazýshylar odaǵy basqarmasy