Qaraǵandy qalasynda Ustazdar kúni merekesine oraı óńirdiń úzdik dep tanylǵan pedagog mamandary oblys ákiminiń arnaıy syılyǵymen marapattaldy. Olardyń arasynda 103 jasqa tolǵan ardager ustaz Sháýkeı Juqanuly men 100 jastaǵy qart muǵalim Marııa Volodko da boldy.
Saltanatty sharany Qaraǵandy oblysy ákiminiń orynbasary Jandos Ábishev ashty.
– Elbasy Nursultan Nazarbaev Qazaqstan halqyna arnaǵan Joldaýynda muǵalimderdi olardyń tikeleı mindeti bolyp tabylmaıtyn jumystardan bosatýdy aıtyp, ustazdardy jaqtady. Osynyń barlyǵy «Pedagog mártebesi týraly» zańda eskeriletin bolady. Prezıdent kelesi jyly ol zańdy qabyldaýdy tapsyrdy. Qurmetti pedagogtar, Qaraǵandy oblysynyń ákimi Erlan Qoshanovtyń atynan sizderdi Ustazdar kúnimen quttyqtaýǵa ruqsat etińizder! Bul árkim úshin óziniń alǵashqy ustazyn eske alýǵa sebep bolatyn keremet mereke. Alǵashqy ustaz – eń jaqyn, júrekke eń ystyq adam, – dep atap ótti Jandos Ábishev.
Saltanatty marapattaý keshinde úzdik dep tanylǵan 13 ustazdyń árqaısysyna 500 000 teńgeniń sertıfıkattary men dıplomdar tabys etildi. Budan bólek, «Bilim salasyn damytýǵa qosqan erekshe úlesi úshin» atalymy boıynsha 8 pedagog mamanǵa 1 mıllıon teńgeden syıaqy berildi. Saltanatty keshtiń sońy óner juldyzdarynyń konsertimen túıindeldi. Ustazdar aldynda tanymal ánshi jáne prodıýser Qydyráli Bolmanov pen Qaraqat Ábildına, ánshi Adam, bıshi Ataı О́mirzaqov, sonymen birge vokal jáne horeografııa ujymdary óner kórsetti.
Qaırat ÁBILDA,
«Egemen Qazaqstan»
QARAǴANDY