Esimi Jetisý óńirine áıgili eńbek ardageri, «Qurmet» ordeniniń ıegeri, Almaty oblysynyń qurmetti azamaty Bátıma Saqaýova jaıly estelikter jınaǵy jaryq kórdi.
Balalyq shaǵy Ekinshi dúnıejúzilik soǵys jyldaryna tap kelip, eńbekke erte aralasqan Bátıma Saqaýovanyń kolhozdyń qarapaıym jumysshysynan bastalǵan eńbek joly túrli partııa, keńes qyzmetinde basshylyq jasaýǵa deıin jetkizip, abyroıly el anasy atanýǵa jol ashty. Jetisý ólkesiniń qadirmendi qarııasyna aınalǵan Bátıma apa byltyr, 92 jasqa qaraǵan shaǵynda dúnıeden ótken edi.
Tusaýy kesilgen «Bátıma ana» kitaby qarııa jaıly estelikter, esseler, ocherkter men arnaý óleńderdiń basyn biriktirgen 5 bólimnen turady. Kitapty óńirdiń tanymal jýrnalısi, «Egemen Qazaqstan» gazetiniń ardageri Kúmisjan Baıjan qurastyrdy. Al onyń jaryq kórýine Májilis depýtaty Serik Úmbetov muryndyq boldy.
– Ǵıbratty ǵumyry el jadynan oryn alyp, jurtshylyqtyń júreginde máńgilik óshpesteı jattalyp qalǵan Jetisýdyń azamattary kóp. Solardyń biregeıi kózi tirisinde Jetisý jurtynyń ardaqty anasy atanǵan Bátıma Esbolatqyzy Saqaýova. Ol jaıly kitapta óńirimizdiń órkendep ósýine ólsheýsiz úles qosqan Bátıma apamyzdyń kópke úlgi bolarlyq ónegeli ómiri men bıik adamgershilik qasıeti, joǵary uıymdastyrýshylyq qabileti týraly jan-jaqty aıtylady, – deıdi oblystyq Tilderdi damytý basqarmasynyń basshysy Aıdar Bashbaev.
Qalmahanbet MUQAMETQALI,
«Egemen Qazaqstan»
Almaty oblysy