Túrkistan eńbek kúshi bar, birqatar salalardy damytýǵa qolaıly oblys. Prezıdent janyndaǵy Qazaqstan strategııalyq zertteýler ınstıtýtynyń sarapshylary óńir áleýetin osylaı baǵalady. Elbasy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn júzege asyrý boıynsha ótken aımaqtyq sarapshylar kezdesýinde atalǵan ınstıtýttyń áleýmettik-saıası zertteýler bóliminiń basshysy Alýa Joldybalına «О́mir sapasynyń deńgeıi: negizgi ólshemderi men ındıkatorlary» taqyrybynda baıandama jasady.
Túrkistan oblysy ákimdiginiń ishki saıasat basqarmasymen birlesip ótkizgen jıyn Q.A.Iаsaýı atyndaǵy HQTÝ-dyń mádenıet saraıynda ótti.
«Túrkistan oblysynyń jańadan qurylýynyń ózi bul óńirdiń áleýeti myqty ekenin bildiredi. Sebebi, eńbek kúshi bar ári birqatar salalardy damytýǵa qolaıly oblys. Osy bastama arqyly Túrkistanǵa ınvestısııa tartylyp, halyqtyń ál-aýqaty kóteriledi. Elbasy Joldaýyndaǵy basty mindet te — osy. Iаǵnı, eldiń turmys deńgeıin kóterý», degen A. Joldybalına ómir sapasyn anyqtaýdaǵy negizgi ındıkatorlar men ólshemder týraly túsindirip berdi.
Al ınstıtýttyń aqparattyq-taldaý jumysy bóliminiń basshysy Ásel Nazarbetova «Jańa zamannyń memlekettik qyzmetkerleri - el saıasatynyń tıimdi júzege asýynyń negizi» taqyrybynda oı qozǵady.
«Elbasy memlekettik qyzmetshilerdiń deńgeıin, memlekettik organdardyń tıimdiligin arttyrý jóninde tapsyrma berdi. Bul baǵytta da jańa bastamalar qolǵa alynyp jatyr. Máselen, eski júıe boıynsha memlekettik qyzmetkerdiń jalaqysy onyń laýazymy men eńbek ótiline baılanysty bolatyn. Al, jańa júıe boıynsha jumystyń kúrdeliligi eskeriledi. Jumysty sapaly istegen qyzmetkerlerge bonýstar beriledi. Osy arqyly basshylyq pen mamandar jalaqysy arasyndaǵy alshaqtyq tómendeıdi», dedi ol.
Belgili saıasattanýshy Bórihan Nurmuhammed Túrkistandaǵy jetekshi oqý oryndary memlekettik basqarý, ýrbanızasııa, týrızm salalary boıynsha myqty mamandar daıarlaýdy kúsheıtýleri tıis dep esepteıdi. Saıasattanýshynyń pikirinshe, bıyl bir jylda eki Joldaýdyń jarııalanýynyń astarynda Elbasynyń áleýmettik máselelerdi jyldam sheshý maqsaty jatyr.
Sebebi, úsh aı buryn aıtylǵan tapsyrmalar men bastamalardy kelesi jyldyń bıýdjetine engizýge múmkindik bar. Jıyndy júrgizip otyrǵan oblystyq ishki saıasat basqarmasynyń basshysy Beısenbaı Tájibaev sarapshylardyń pikirleri stýdentter men oqytýshylarǵa serpin beretinin jetkizdi. Kezdesý sońynda jıynǵa qatysýshylarmen qoǵamdaǵy ózekti máselelerge jedel monıtorıng jasaý jóninde semınar-trenıng ótkizildi.
Ǵalymjan ELShIBAI,
«Egemen Qazaqstan»
Túrkistan oblysy