Almaty oblysynda qoǵamdyq qaýipsizdik sharalarynyń sapasyn arttyrý maqsatynda aýdandar men eldi mekenderde ýchaskelik polısııa pýnkterin ashý jumystarynyń alǵashqy kezeńi aıaqtaldy.
2014 jyldan beri bastalǵan iske oblystyq bıýdjetten 3,3 mlrd teńge qarjy bólingen bolatyn. Bıylǵy jyl sońyna deıin aıaqtalýy tıis joba merziminen buryn júzege asyp, aımaq boıynsha turǵyn úımen biriktiriligen 100 ǵımarat salyndy. Iаǵnı, endi alys aýdandardaǵy tártip saqshylary jumys orny men qatar baspanamen de qamtylyp otyr.
Tártip saqshylaryn turǵyn úı jáne jumys kabınetimen qamtamasyz etý óńirdegi quqyq buzýshylyqtyń aldyn alyp, polısııa qyzmetiniń sapasyn arttyrmaq. Bul jumystar qoldanysqa berilgen 100 polısııa pýnktimen toqtap qalmaıdy. Jyl sońyna deıin taǵy 77 nysannyń qurylys aıaqtalsa, keler jyly 43 nysan salý josparda tur. Nátıjesinde, aımaqtaǵy quqyq qorǵaý qyzmetiniń jumysyn jeńildetý úshin bólingen qarjy tolyq ıgerilip, eldi mekenderdegi polısııa pýnktteri esik ashpaq. Atap aıtqanda, Eńbekshiqazaq, Jambyl aýdandarynda 25 ýchaskelik polısııa pýnkti, Alakól aýdanynda - on toǵyz, Kerbulaqta – 14, Aqsý, Uıǵyr aýdandarynda – 13, Panfılov aýdanynda – 12, Ile, Balqash aýdandarynda – 11, Eskeldi aýdanynda – 10, Kóksý, Kegen, Talǵar, Raıymbek aýdandarynda - 9, Qarasaı aýdanynda – 8, Sarqan, Qaratal aýdandary men Taldyqorǵan qalasynda – 6, Qapshaǵaı qalasynda – 2 jáne Tekelide 1 polısııa pýnkti jumys isteıtin bolady.
Qalmahanbet MUQAMETQALI,
«Egemen Qazaqstan»
Almaty oblysy