Eńbek jáne áleýmettik qorǵaý mınıstri Mádıná Ábilqasymova jetekshilik etken respýblıkalyq aqparattyq-nasıhattyq toptyń músheleri birqatar mekeme-kásiporyndardy aralap, eńbek ujymdarymen kezdesti.
Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy boıynsha jumys kúshi kóp óńirlerden bıyl 1200 adam kóship keldi. Qyzyljar aýdanynda turǵyndarmen ótken kezdesýde Eńbek jáne áleýmettik qorǵaý mınıstri qonystanýshylardy jumysqa ornalastyrý, jaıly baspanamen qamtý, basqa da áleýmettik jaǵdaılardy jasaý baǵytynda jergilikti jerde atqarylyp jatqan sharalarǵa oń baǵa berdi. Ol Elbasynyń bıylǵy Joldaýynda respýblıka turǵyndarynyń ál-aýqaty men turmys sapasyn arttyrý baǵytynda irgeli mindetter qoıylǵanyn, oǵan qol jetkizýdiń barlyq múmkindikteri qarastyrylǵanyn atap ótti.
«Kelesi jylda Soltústik Qazaqstan oblysynda qoljetimdi turǵyn úı qanatqaqty jobasy iske qosylady. Ol boıynsha ár baspana úshin 6 mıllıon teńge mólsherinde qarajat bólý, keıin jekemenshikke satyp alý joldary qarastyrylǵan. Kúngeıden kóship kelýshiler arasynda bilikti mamandar az emes. Teriskeıde dáriger, muǵalim kadrlary jetispeıdi. Keleshekte osyndaı olqylyqtardyń orny toltyrylatyn bolady», degen M. Ábilqasymova túıtkildi máselelerdi de nazardan tys qaldyrǵan joq.
Odan keıin «Ahmýddınov» sharýa qojalyǵynyń jumysymen tanysty. Onyń dırektory Sermuhamed Oraluly aǵashty qaldyqsyz óńdeýmen aınalysatyndaryn, ońtústikten kelgen azamattardyń jumys isteıtinin, 70 adamnyń jumyspen qamtamasyz etilgenin, aldaǵy ýaqytta 40 adamdyq jańa jumys orny qurylatynyn jetkizdi. Aqjarqyn Dáýlettiń otbasy osydan eki jyl buryn Túrkistan oblysynan kóship kelipti. Shyǵys medısınanyń qyr-syryn meńgergen otaǵasy jeńilditi baǵdarlama aıasynda 14 mıllıon teńge nesıe alypty. Jubaıy stýdentterge sabaq beredi.
Beskól mektep-gımnazııasynda ótken kezdesýde mektepke deıingi bilim berý, «Pedagog mártebesi» zańynyń qabyldanýy jaıly máseleleri muǵalimderdiń eren qyzyǵýshylyǵyn týdyrdy.
Petropavl áleýmettik qyzmet kórsetý ortalyǵynda 300 naýqasqa qyzmet kórsetiledi. Olardyń 23-i–birinshi toptaǵy múgedekter. Mekemede psıhologtar, arnaıy sensorly kabınet jumys isteıdi. Ujymmen kezdesken mınıstr qoıylǵan suraqtarǵa jaýap berip, Joldaýdan týyndaıtyn aýqymdy mindetterge baılanysty keleshekte atqarylatyn is-josparlarmen bólisti.
Aqparattyq-nasıhattyq toptyń ózge músheleri de birqatar áleýmettik nysandarda ótken kezdesý-júzdesýlerde Joldaý talaptaryn jan-jaqty túsindirip, Elbasy tapsyrmalaryn birlesip atqarýǵa shaqyrdy.
О́mir ESQALI,
«Egemen Qazaqstan»
Soltústik Qazaqstan oblysy