Qazaqstan barlyq ıadrolyq qarýsyz aımaqtar kóshbasshylarynyń kezdesýin ótkizýge daıyn. Bul týraly Qazaqstannyń BUU janyndaǵy Turaqty ókildigi BUU-nyń Qarýsyzdaný jónindegi bólimimen birlesip Nıý-Iorkte uıymdastyrǵan ıadrolyq máselelerdi talqylaý jónindegi forýmda aıtyldy.
Is-sharaǵa BUU Bas hatshysynyń orynbasary jáne Qarýsyzdaný máseleleri jónindegi joǵary ókili Izýmı Nakamısý, Latyn Amerıkasy men Karıb basseıninde ıadrolyq qarýǵa tyıym salý jónindegi agenttiktiń (OPANAL) bas hatshysy Lýıs Fılıpe de Masedo Sýaresh, BUU qarýsyzdaný problemalaryn zertteý ınstıtýtynyń (IýNIDIR) aǵa ókili Djon Borrı, Mońǵolııanyń BUU janyndaǵy turaqty ókili Sýhbold Sýkhı, sondaı-aq BUU-ǵa múshe-memleketterdiń basqa da joǵary ókilderi qatysty.
Jıynǵa qatysýshylar ıadrolyq qarýsyz aımaqtar jahandyq ıadrolyq qarýsyzdaný jáne ıadrolyq qarýdy taratpaý isinde mańyzdy element bolyp qala beretinin jáne ıadrolyq qarýsyz álemge qol jetkizýge baǵyttalǵan halyqaralyq kúsh-jigerdiń negizi bolýy tıis ekenin atap ótti.
Forým barysynda Qazaqstan Syrtqy ister mınıstriniń orynbasary Erjan Ashyqbaev ıadrolyq qarýsyz aımaqtar bir-birimen tyǵyz jáne tıimdi is-qımyldy jolǵa qoıǵan jaǵdaıda úlken jetistikke jete alatynyna toqtaldy. Bul qarýsyzdaný máselelerin sheshýdegi olardyń saıası salmaǵyn jáne bedelin arttyratyny anyq.
Qazaqstandyq dıplomat: «2017 jyldyń tamyzynda MAGATE-niń tómen baıytylǵan ýran bankiniń Qazaqstanda ashylý saltanatynda jarııalanǵan ıadrolyq qarýsyz aımaqtardyń kúsh-jigerin nyǵaıtý jónindegi Qazaqstan Respýblıkasynyń Prezıdenti Nursultan Nazarbaevtyń bastamasynyń bizdiń ujymdyq kúsh-jigerimizdi iske asyrýdaǵy ózektiligi joǵary», dep málimdeı otyryp, joǵary deńgeıdegi aımaqaralyq kezdesýlerdi turaqty uıymdastyrýdyń mańyzdylyǵyn atap ótti.
«Qazaqstan aımaq arasyndaǵy ózara árekettestikti kúsheıtý boıynsha birlesken qadamdardy jan-jaqty talqylaý úshin qazirgi barlyq ıadrolyq qarýsyz aımaqtardyń jáne Mońǵolııanyń kóshbasshylaryn, sondaı-aq osy saladaǵy kórnekti belsendilerdi shaqyra otyryp, osyndaı alǵashqy kezdesýdi óz aýmaǵynda uıymdastyrýǵa daıyn», dedi E.Ashyqbaev.
I.Nakamısý BUU Bas hatshysynyń qarýsyzdandyrý týraly jańa kún tártibine súıene otyryp, ıadrolyq qarýdan azat aımaqtardy nyǵaıtý jáne kúsheıtý, Taıaý Shyǵys sııaqty óńirlerde osyndaı aımaqtardy odan ári qurý maqsatynda múshe-memlekettermen jumys isteýge daıyn ekenin bildirdi. Sol kúni BUU Qaýipsizdik Keńesinde Taıaý Shyǵystaǵy jaǵdaı, onyń ishinde Palestına máselesi boıynsha ashyq pikirtalastar ótti.
E.Ashyqbaev pikirtalastarda sóılegen sózinde Taıaý Shyǵystaǵy oqıǵalardyń turaqsyzdyǵy men ózara baılanysy tek osy óńirde ǵana emes, sonymen qatar odan tys jerlerde alańdaýshylyq týǵyzyp, jahandyq qaýipsizdikke eleýli yqpalyn tıgizip jatqanyn atap ótti.
Ol Qazaqstannyń Palestınanyń táýelsizdikke, Izraıldiń qaýipsizdikke qol jetkizý quqyǵyn qoldaýǵa qatysty pozısııasyn qaıta atap, BUU Jarǵysyna jáne BUU Qaýipsizdik Keńesiniń tıisti qararlaryna sáıkes ekijaqty formatta jáne aldyn ala shartsyz kelissózderdi jýyq arada ótkizýge shaqyrdy.
Qazaqstannyń ókili óz sózinde Sırııadaǵy, Lıvandaǵy, Iraktaǵy, Iemendegi jaǵdaılarǵa toqtaldy jáne 46 memlekettiń bedeldi rýhanı kóshbasshylary men dinı qaıratkerleriniń qatysýymen Astanada ótken Álemdik jáne dástúrli dinder kóshbasshylarynyń VI seziniń qorytyndysy týraly baıandady.
«Egemen-aqparat»