Bıyl «UCI Asia Tour» dodasyna qatysqandar arasynda 26 jastaǵy jerlesimiz Alekseı Lýsenko úzdik dep tanylyp, halyqaralyq velosport odaǵynyń jańartylǵan reıtınginde kósh bastady.
Azııa oıyndarynyń úsh dúrkin jeńimpazy jáne qurlyq chempıony atanyp, birqatar halyqaralyq dodalarda túrli júldelerge ıe bolǵan qazaqstandyq veloshabandoz bul joly 655 upaı jıyp, barlyq qarsylastarynan edáýir qara úzip ketti. Joǵaryda atalǵan reıtıngte ekinshi oryndy Bendjamın Dıbell ıelendi. Avstralııanyń ókili 517 upaıdy enshiledi. Úshinshi orynda – Artem Ovechkın. Reseı sportshysy 484 upaıdy qorjynǵa saldy.
Sondaı-aq, Qazaqstan quramasy ulttyq reıtıngte de kósh bastady. Bizdiń komanda 1611,25 upaıdy olajalady. Ekinshi jáne úshinshi oryndarda – Japonııa (1581,73) men Gonkong (945,02).
Ǵalym SÚLEIMEN,
«Egemen Qazaqstan»