Q.Toqaev Dúnıejúzilik densaýlyq saqtaý uıymynyń Bas dırektory T.Gebreıesýspen Astana forýmynyń qorytyndysyn talqylady, dep habarlaıdy Parlament Senatynyń baspasóz qyzmeti.
Parlament Senatynyń Tóraǵasy Qasym-Jomart Toqaev Dúnıejúzilik densaýlyq saqtaý uıymynyń Bas dırektory Tedros Gebreıesýsty qabyldap, Alǵashqy-medısınalyq sanıtarlyq kómek jónindegi Almaty deklarasııasynyń 40 jyl tolýyna oraı Uıymnyń jahandyq konferensııaǵa qoldaý kórsetkeni úshin alǵys bildirdi. «Qazaqstan úshin bul – ilgerileýge jasaǵan úlken qadam. Atqaryp otyrǵan jumysyńyzben maqtanýǵa tolyq negiz bar», - dedi Q.Toqaev. Onyń aıtýynsha, Qazaqstan BUU-nyń 2030 jylǵa deıingi turaqty damý maqsattaryn qoldaıdy.
Bas dırektor Konferensııanyń tarıhı mańyzyna toqtalyp, alǵashqy medısınalyq-sanıtarlyq kómek kórsetý jónindegi qabyldanǵan Astana deklarasııasy halyqqa zamanaýı sıfrly tehnologııalardy qoldana otyryp, medısınalyq qyzmetke qol jetkizýdi qamtamasyz etýde úlken ról atqaratynyn atap ótti. «Qazaqstan alǵashqy medısınalyq-sanıtarlyq kómek kórsetýde basty ról atqara alady jáne atqarýy tıis. Bul Qazaqstannyń brendine aınalýy múmkin», - dep atap ótti T.Gebreıesýs. Onyń pikirinshe, Qazaqstannyń densaýlyq saqtaý salasynda júrgizip otyrǵan saıasaty damýshy elderge úlgi bola alady. Ol Dúnıejúzilik densaýlyq saqtaý uıymy «Deklarasııa tilin – áreketter tiline aýdarý» boıynsha jumysty bastap ketkenin de atap ótti.
Senat Tóraǵasy BUU aıasynda densaýlyq saqtaý salasyndaǵy halyqaralyq qyzmetti úılestirýdegi Dúnıejúzilik densaýlyq saqtaý uıymynyń jetistikterin atap ótip, Qazaqstan Prezıdenti N.Nazarbaevtyń halyqqa Joldaýyndaǵy mańyzdy máseleler, atap aıtqanda, bilim berý, ǵylym men densaýlyq saqtaý salalarynyń shyǵyndaryn Ishki jalpy ónimniń 10 paızyna deıin jetkizý mindeti týraly aıtty.
Dúnıejúzilik densaýlyq saqtaý uıymynyń Eýropa aımaqtyq bıýrosynyń dırektory J.Iаkob elimizdiń densaýlyq saqtaý salasyn birtindep damytý, balalar men náreste ólimi kórsetkishterin tómendetý men temeki tartýmen kúres jónindegi jumys deńgeıine kóńili tolatynyn jetkizdi. Onyń pikirinshe, Almatyda «BUU úıin» ashý Qazaqstan úshin ǵana emes, barlyq aımaq úshin óte mańyzdy. «Bizdiń uzaq merzimdi yntymaqtastyǵymyz nyǵaıa túsetinine senemin», - dedi J.Iаkab.
Q.Toqaev Senat óz jumysynda qazaqstandyqtardyń densaýlyǵyn jaqsartýǵa baǵyttalǵan halyqaralyq kúsh-jigerdi zańnamalyq turǵyda qoldaýǵa ázir ekenin jetkizdi.