Jambyl oblysynda «Almaty – Qordaı – Blagoveshenka – Merki – Tashkent–Termez» tas jolynyń ýchaskesi paıdalanýǵa berildi. «Qordaı asýyn aınalyp ótý» II kezeginiń qurylysy» jobasyn BI Group holdınginiń jol dıvızıony – «Kazahdorstroı» sátti aıaqtady.
Joldyń ashylý saltanatyna jaqyn mańdaǵy aýyl turǵyndary, jergilikti jáne aımaqtyq ákimdik ókilderi, sondaı-aq alǵashqy sımvolıkalyq avtokolonnany qarsy alǵan «Qazavtojol» operator-kompanııasy qatysty. Jahandyq aýqymdaǵy bul jobanyń ekinshi lotyn tapsyrý eldiń asa mańyzdy ekonomıkalyq mańyzy bar «Batys Eýropa ‒ Batys Qytaı» halyqaralyq kólik dáliziniń taǵy bir daıyn ýchaskesin alǵanyn bildiredi. «Asýmen kele jatqan eski jol ekinshi kategorııaǵa jatady, deıdi «Kazahdorstroı» dıvızıonynyń dırektory Zaǵapar Doshanov. – Bul asýda ol kóliktiń ósip kele jatqan aǵyny úshin qaýipsiz emes, sonymen qatar ásirese qysqy ýaqytta bul jerde únemi keptelek oryn alady».
I B sanattaǵy jańa jol endi asýlardy aınalyp ótip, kólik júrgizýshilerge ýaqytty únemdep qana qoımaı, ózderin qaýipsiz jáne jaıly sezinýge múmkindik beredi. Onyń basym bóligi betondy, biraq tik betkeıleri men burylystary asfalttalǵan. Bul, ásirese qysqy ýaqytta kólik dóńgeleginiń jolmen birkelki janasa qozǵalýyna múkindik beredi.
Uzyndyǵy 40 shaqyrymdyq eki jolaqty joldyń aıaqtalǵan ýchaskesi tolyq jıyntyqta tapsyryldy: bólý jolaǵy, avtokólik turaǵyna arnalǵan alańdar, elektr berý jelileri, avtobýs aıaldamasy, jolaıryqtar, jol-patrýldik beketi bar. Joldyń eni – 7,5 metr. Qozǵalystyń eseptik jyldamdyǵy – 100-120 km/saǵ.
Klımattyń qatty ystyq ári úzdiksiz jel soǵyp turatyny eskerilgendikten, jumystar ótken jyldan bastap júrgizildi. Tabıǵat birneshe ret jumysqa kedergi keltirgenimen, izdengish qurylysshylar tyǵyryqtan shyǵar jol taýyp, obektini ýaqytynda paıdalanýǵa berdi. «Betonnyń ózine tán erekshelikteri bar, ‒ dep atap ótti joba jetekshisi Shatbek Baısynov, ‒ eger ony +25 gradýstan joǵary temperatýrada tósese, ol tym tez kebedi jáne birkelki bolmaıdy. Jeldiń de jumysqa kedergi keltiretinin joǵaryda aıttym, sondyqtan ol sekýndyna 7-10 m jyldamdyqpen soqqan kezde biz jumysty toqtatyp otyrdyq».
Alaıda tájirıbeli komandaǵa tabıǵat qıynshylyqtary esh tosqaýyl bola almady. Ońtústiktiń jyly klımatyn paıdalana otyryp, munda jumystar eki aýysymda júrgizildi, bul qajetti qarqyn men nátıjeni qamtamasyz etti.
Esterińizge sala keteıik, ótken jyly «Kazahdorstroı» dıvızıony osy trassanyń 40 shaqyrymdyq birinshi lotyn paıdalanýǵa bergen bolatyn.
Hamıt ESAMAN,
«Egemen Qazaqstan»
Jambyl oblysy