Búgin elordadaǵy Ortalyq kommýnıkasııalar qyzmetinde Qyzylorda oblysynyń ákimi Qyrymbek Kósherbaev óńirdiń bıylǵy 9 aıdaǵy negizgi jetistikteri, áleýmettik-ekonomıkalyq damýy týraly baıandady.
Aımaq basshysy sózin óńir ekonomıkasyna áser etken ma ńyzdy máselelerden bastady. Shıkizattyq emes sektordy damytý arqyly ekonomıkany ártaraptandyrý basty mindet ekendigin basa aıtty.
– Jeltoqsan aıynda Qazaqstan-Qytaı yntymaqtastyǵy baǵdarlamasy aıasynda júzege asyrylyp jatqan tamponajdy sement zaýytyn merziminen buryn iske qosamyz. 26 qazanda «Shalqııa» qorǵasyn-myrysh ken ornynda taý-ken baıytý kombınatynyń qurylysy bastaldy, – dedi oblys ákimi.
Sý tapshylyǵy men aýa raıynyń qolaısyzdyǵyna qaramastan, «kúrishtiń otany» atanyp ketken óńirde kúrish sharýashylyǵy agroónerkásiptik keshenniń jetekshi salasy bolyp qala beredi. Máselen, bıyl 473 myń tonna ónim jınalǵan.
Aıta keteıik, 2018 jyldyń basynda oblysta ózin-ózi jumyspen qamtyǵandar men jumyssyz azamattar sany – 97 538 bolsa, 9 aıdyń ishinde olardyń sany 62 myń adamǵa qysqardy. Taǵy bir aıta ketetin jaıt, shaǵyn jáne orta bıznes salasynda 14 myńnan astam adam jumyspen qamtyldy.
Sonymen qatar óńirde sýmen qamtamasyz etý jáne gazben jabdyqtaý máseleleri sheshimin tabýda. Qazirgi tańda óńir halqynyń 95%-y ortalyqtandyrylǵan sýmen qamtamasyz etilgen, 63%-y tabıǵı gazdy tutynady. О́tken jyly Qyzylorda qalasy men 7 aýdan ortalyǵynyń 4-ýi gazdandyryldy. 2017 jyly Baıqońyr qalasyna gaz berildi. Bıyl qalǵan úsh aýdanǵa, atap aıtqanda, Qarmaqshy, Syrdarııa jáne Jalaǵash aýdandaryna gaz jetkiziletin bolady. 2019 jyly aýyldyq eldi mekenderdegi gaz jelisiniń qurylysy júrgiziledi. Sonymen 2020 jylǵa qaraı oblys turǵyndaryn kógildir otynmen qamtamasyz etý deńgeıin 95%-ǵa jetkizý mindeti qoıylyp otyr.
Qarlyǵash QURAMYS,
«Egemen Qazaqstan