Qostanaı qalasynda grek-rım kúresinen QR eńbek sińirgen jattyqtyrýshy, KSRO sport sheberi marqum Vladımır Petrovıch Matvıenkony eske alýǵa arnalǵan dástúrli oblystyq týrnır ótti. Oǵan 2002-2004 jyly týǵan 180 balýan qatysty.
Týrnır oblystyq dep atalsa da oǵan balýandar elimizdiń oblystarynan, oblys aýdandary men qalalarynan jáne Reseı men Qyrǵyzstannan da kelip qatysty. Vladımır Petrovıch ómiriniń sońyna deıin grek-rım kúresinen oblystaǵy bas jattyqtyrýshy boldy. Onyń aldynan júzdegen sportshy shákirtter shynyǵyp shyqty. Oblystyq deneshynyqtyrý jáne sport basqarmasynyń basshysy Evgenıı Vılıamstiń aıtýynsha, ýaqytynda grek-rım kúresinen Qazaqstan quramasynyń jartysynan kóbi Qostanaı grek-rım kúresi mektebiniń túlekteri bolatyn.
Jattyqtyrýshy ustazdy eske alý úshin onyń sportta úlken jetistikterge jetken dostary men shákirtteri keldi. Olardyń arasynda Atlanta olımpıadasynyń chempıony Iýrıı Melnıchenko, Álem kýboginiń 4 márte ıegeri, Eýropa chempıony Bısolt Desıev, Azııa jáne Álem chempıony Baqtııar Báıseıitov jáne taǵy basqalar bar.
Vladımır Petrovıch grek-rım kúresinen 45 KSRO sport sheberin, 3 halyqaralyq sport sheberin, bir QR eńbek sińirgen sport sheberin tárbıelegen edi. Olardyń arasynda óziniń Sergeı jáne Valerıı atty eki uly da bar. Sergeı – QR eńbek sińirgeng sport sheberi bolsa, Valerıı halyqaralyq spor sheberi atandy.
«Vladımır Petrovıch olımpıadalyq bıikti maqsat tutqan jattyqtyrýshy boldy.Onyń ómiri sportshylarǵa jáne jalpy jastarǵa úlgi-ónege» dedi oblys ákiminiń orynbasary Marat Júndibaev.
Týrnırde balýandar 10 salmaq dárejesinde beldesti. Sonyń ishinde 4 salmaqta qostanaılyq balýandar birinshi oryndy jeńip aldy.
Názıra Járimbet,
«Egemen Qazaqstan»
Qostanaı