Boksshy, Olımpıadanyń jáne álemniń 2 dúrkin kúmis júldegeri Ádilbek Nııazymbetov 2011 jyly sportty qoıyp ketýi múmkin bolǵanyn málimdedi. Bul týraly ol «Egemen Qazaqstan» gazetine bergen suhbatynda aıtty.
«2011 jyldyń aqpan aıynda Almatyda ótken el birinshiliginde qaıta qyrsyq shaldy. Almaty qalasynyń atynan synǵa túsken Shyńǵys Berdibekovten 2:1 esebimen utyldym da qaldym. Babym kelisip turǵan sııaqty. Biraq ózime baǵyttalǵan soqqylardy baıqamaı qala berýim jıi qaıtalanatyndaı kórindi. Kezdesýden soń birden bapkerime aıttym. Dárigerge teksertip kórsek, sol kózim alysty tipti kórmeıdi eken. Kózimdi teksergen dáriger «Boksty qoıýyń kerek» dep short kesti», dedi Á. Nııazymbetov.
Onyń aıtýynsha, mundaı jaǵdaıda adamnyń kózi kórmeı qalýy múmkin eken. Sondyqtan sportshy bokspen qoshtasý týraly da oılanypty.
«Bapkerim Marat Jaqıev «Áı, bala! Biz bes-alty jarysta qatarynan utylsaq ta boksty qoıǵanymyz joq. Sondyqtan keler kúnnen úmit úzbeıik. Sońyna deıin barýyń kerek» dep qaırady. Oılana kele, Orynborǵa baryp kózimdi emdettik. Qarjy máselesiniń bárin bapkerim ózi rettedi», dedi ol.
Ádilbek Nııazymbetov – Qazaqstannyń eńbek sińirgen sport sheberi, Qurmet ordeniniń ıegeri, Bakýde jáne Almatyda ótken áýesqoı bokstan álem chempıonattarynyń kúmis júldegeri. Jartylaı aýyr salmaqta 2012 jyly Londonda, 2016 jyly Rıo-de-Janeıroda ótken Jazǵy Olımpıada oıyndarynda kúmis medalǵa ıe boldy.