Temirtaýda qabyrǵasy áınek polısııa beketi ashyldy

Jańa ǵımarattyń ishinde polısııa qyzmetkerleri men kelýshilerge barynsha yń­ǵaı­ly jaǵdaı jasalypty. Ǵımarat ishindegi bólmelerdiń barlyǵyna beınekameralar ornatylǵan. Turǵyndar úshin bul jerde túrli keńester alýǵa,  aryz-shaǵymdaryn tez ara­da tapsyrýǵa múmkindik týdy. 

Shyny ǵımarattyń ishin­de ne bolyp jatqanyn syrttan baqylap kórýge bolady. Munyń ózi ashyqtyq, shynaıylyq prınsıpterin pash etedi. By­laısha aıtqan­da, polısııa ju­mysy tur­ǵyn­dardyń tikeleı kóz aldynda bolady. О́z kezeginde tártip saqshylary da áınek qabyrǵadan aınalada ne bolyp jatqanyn ishte otyryp-aq baqylaýǵa múmkindik aldy. 

– О́tken jyly biz osyndaı nysandy salý týraly oblys basshylyǵyna usy­nys­pen shyqqan bolatynbyz. О́ńir basshysy ony qol­dady. Bıýdjetten qarajat bólindi – shamamen 60 mln teńge. Osy jyldyń naýryzynda qurylys bastaldy da qyrkúıekte aıaq­taldy, – dedi oblystyq IID bastyǵy Mergenbaı Japparov. – Eń bastysy, bári syrt kózge kórinip turady jáne esik barshaǵa árdaıym ashyq. 

Bul jerde táýlik boıy jol-patrýldik polısııa qyz­metkerleri kezekshilik ete­tin bolady. Al bekettiń ishin­de ýchaskelik polıseıler, kámeletke tolmaǵandar isi jónindegi jáne probasııa qyzmetiniń ınspektorlary jumys isteıdi. 

Ýchaskelik polısııa bóli­mi to­lyqtaı kompıýter­len­di­ril­­­gen. Barlyq quqyq qorǵaý or­gan­darynyń málimetter bazasyna kirý múmkindigi bar. Ol júıe mun­da jetkizilgen azamat­tar­dy esepteýler boıyn­sha tek­­­se­­ris­ten ótkizýge – iz­deý­de bol­ǵan-bolmaǵany, aıyp­pul­dar bo­ıynsha qaryz­da­ry bar ma, joq pa, buryn-soń­dy sot­tal­ǵan ba jáne t.b. saýal­dar­ǵa jaýap alýǵa múm­kindik beredi.

Jańa polısııa beketiniń ju­­mysymen oblys ákimi Erlan Qo­shanov arnaıy baryp, tanysyp qaıtty. О́ńir bas­shysy ob­lys­ta mundaı polı­sııa beket­te­rin salý jumys­taryn jal­ǵas­­ty­rýdy tap­syrdy. Qara­ǵan­­dy ob­lys­tyq IID bastyǵy M.Jap­parov kelesi jyly Qa­ra­­ǵandy, Temi­rtaý jáne Jez­­qazǵan qala­larynda dál osyn­d­aı 10 polısııa beketin ashý jos­­parlanǵanyn málim etti.

Qaırat ÁBILDA,

«Egemen Qazaqstan»

QARAǴANDY