Anar JAIYLǴANOVA,
Parlament Májilisiniń depýtaty
Elbasy Joldaýda ishki ister organdarynyń qyzmetkerleri qylmyspen kúreste «aldyńǵy shepte» júredi, kóbine óz basyn qaterge tigip, azamattardy qorǵaıdy dep atap kórsetti. Rasynda, Ishki ister mınıstrliginiń aqparatyna súıensek, táýelsizdik jyldarynda polısııa jáne Ulttyq Ulan qyzmetkerlerin qosa alǵanda, memlekettik marapattaýǵa 130 adam óz qyzmetin atqarý kezinde qaza bolǵannan keıin usynylǵan eken. Osy jyldyń ózinde ǵana qyzmet atqarý kezinde 4 polısııa qyzmetkeri qaza bolyp, 84 qyzmetker jaraqat alǵan.
Degenmen, bul salada kemshilikter de az emes. Bıyldyń ózinde ǵana 600 qyzmetker zańsyz is-áreketteri úshin jumystan bosatylǵan. Demek, shtatty ońtaılandyryp, polısııany ózine tıesili emes fýnksııalardan aryltý jáne únemdelgen qarajatty jalaqyny kóbeıtýge, turǵyn úı jáne ózge de áleýmettik máselelerdi sheshýge baǵyttaǵan durys. Shtatty ońtaılandyrýdy asa baıyptylyqpen jasaǵan jón, bilgir mamandardy qaldyryp, olardyń áleýmettik máselelerin de sheshý qajet. Polısııa qyzmetkeriniń kásibı biliktiligin arttyrý máselesin jáne onyń jumys isteý formatyn zamanaýı úlgige laıyqtaý kerek. Búgingi kúni keıbir qylmys túrleri vırtýaldy túrde oryn alyp jatqandyqtan, quqyq qorǵaý qyzmetkerleriniń kásibı biliktiligi joǵary jáne olardyń qyzmeti tehnıkalyq jaǵynan qajetti deńgeıde qamtamasyz etilýi tıis. Osy máselelerdiń barlyǵy júıeli túrde sheshilgen kezde ǵana polısııa qyzmeti halyqtyń senimine ıe bolatyny sózsiz.
Jasulan ISA,
zańger
Menińshe, polısııa jumysyn jańǵyrtý úshin eń aldymen tálimgerlikti qolǵa alyp, osy baǵytty túzetip alý kerek. Qazirgi tańda burynǵy tálimgerlik tájirıbesi nazardan tys qaldy. Jumysqa jańa kelgen jas mamanǵa baǵyt-baǵdar silteıtin adam joq. О́tken jyly «Ispolnenıe nakazanıı» («Jazanyń oryndalýy») jýrnalynda osy jaıly «Nastavnık s bolshoı býkvy» atty maqala jazǵan bolatynmyn. Kóp másele tálimgerge baılanysty. Úıretip, jón siltep otyratyn adamnyń joqtyǵynan jastar jańylys basyp jatady. Osydan kelip polısııanyń atyna syn keledi, qoǵamda olarǵa degen teris kózqaras qalyptasady. Ekinshiden, kadr almastyrý tájirıbesine basa kóńil bólinýi qajet. Bir aýdannyń (IID) jedel qyzmetkerlerin ekinshi aýdanǵa aýystyryp otyrý kerek. Nege deseńiz, bir jerde talaı jyl istegen qyzmetkerdiń kózi úırenip, keleńsiz kórinisterdi baıqamaı qalýy múmkin.
Marat BÁShIMOV,
quqyqtanýshy, zańger
Qaýipsizdiktiń saltanat qurýy quqyq qorǵaý organdarynyń qyzmetine tikeleı baılanysty. Sondyqtan Prezıdent quqyq qorǵaý organdary jumysynda túbegeıli jáne sapaly ózgerister qajet ekendigin aıtty. Úkimetke ishki ister organdary jumysyn jaqsartý jónindegi jol kartasyn ázirleýdi tapsyrdy. Sebebi, sońǵy kezderi quqyq qorǵaý organdary jumysynda qoǵam narazylyǵyn týǵyzǵan kóptegen keleńsiz quqyq buzýshylyqtardyń oryn alǵany belgili. Jol-patrýldik qyzmetiniń jumysy tipten syn kótermeıdi. Kóptegen polısııa qyzmetkerleri zań normalaryn jetik bilmeıdi.
Kóbine polısııa kórsetkishke ǵana súıenedi. Kóbirek ustasa, jaqsy jumys isteıdi degen sóz. Biraq olaı emes ekenin bárimiz de bilemiz. Al mundaı jumys amaly jurtshylyqtyń ashý-yzasyn týǵyzady. О́rkenıetti elderde jón-josyqsyz adamdardy toqtatyp, ákimshilik hattama toltyrý degen joq. Endeshe Prezıdent aıtqandaı, adam sanasynda polısııa jazalaýshy emes, kerisinshe qıyn-qystaý kún týǵanda kómek qolyn sozatyn janashyr retinde qalyptasýy kerek.