Halyq tilegine sáıkes qabyldanǵan qoldanystaǵy Konstıtýsııamyzda kózdelgen áleýmettik memlekettiń basty mindeti – el ekonomıkasy damýynyń joǵary deńgeıin qamtamasyz etý arqyly turǵyndardyń tabys pen turmys sapasyn arttyrý.
Ekonomıkanyń órkendeýi, turǵyndardyń kásipkerlikke, tabysqa negizdelgen materıaldyq aýqattylyǵy jáne turmys sapasynyń udaıy artýy, sonymen qosa tabys pen turmys sapasynyń jetkilikti qorǵalýy demokratııalyq, quqyqtyq jáne qýatty memleket qurýdyń alǵysharty. Elimizde áleýmettik memlekettiń irgetasy Ata Zańda bekitilý arqyly berik qalanǵan.
Elbasy Joldaýynyń kirispe bóliginde, zamanaýı progressıvti memleket qurý barysynda, tarıhı ólshem boıynsha qysqa merzimde, elimizde sapaly, nátıjeli qurylymdyq, konstıtýsııalyq jáne saıası reformalar júrgizilgeni jáne Qazaqstan qoǵamyn jańǵyrtý úderisiniń jalǵasyp jatqany eskerilgen. Demek, Joldaý – elimizde júrgizilip jatqan jańǵyrtý úderisiniń, strategııalyq saıasattyń zańdy jalǵasy jáne tıisti deńgeıin qamtamasyz etetin qujat.
«Qoly jetkenshe nusqaǵan – kósem», dep halyq beker aıtpaıdy. Joldaý kez kelgen qazaqstandyqqa túsinikti sózben jazylǵandyǵymen, halyqtyń turmys sapasyn arttyrý maqsatynda sheshilýge tıisti máseleler aıqyndalǵandyǵymen jáne ony sheshý joldary kórsetip bergendigimen qundy jáne baǵdarlamalyq qujat bolyp otyr. Joldaý halyqqa qansha túsinikti bolǵanymen, Úkimet jáne memlekettik organdar úshin isteıtin jumystyń kólemi keń ári kúrdeli.
Joldaýda azamattardyń áleýmettik-ekonomıkalyq konstıtýsııalyq quqyqtarynyń iske asyrylýyna memleket tarapynan kepildikter berilgen: óz kásibin jaqsy meńgergen adamdardyń laıyqty jalaqy alýyna, jeke kásip ashýǵa, ony damytýǵa qolaıly múmkindik jasaý, shaǵyn jəne orta bıznesti damytý, sapaly ári qoljetimdi baspanamen qamtamasyz etý, ómir súrýge jaıly orta qalyptastyrý, bilim berý, densaýlyq saqtaý qyzmetiniń sapasyn kóterý, sport pen deneshynyqtyrýdyń qoljetimdiligi, sapaly azyq-túlikpen qamtamasyz etý jáne t.b.
Sonymen azamattardyń konstıtýsııalyq áleýmettik-ekonomıkalyq quqyqtarynyń iske asyrylý joldary naqty aıqyndalyp, oryndaý mindettiligi memlekettik bılik organdaryna júktelgen. Oǵan qosa, júrgizilip jatqan reformalar men negizgi strategııalyq qujattardaǵy tapsyrmalardyń oryndalýyna monıtorıng júrgizetin, baǵalaıtyn Ulttyq jańǵyrý keńsesiniń qurylýy halyq – qazy, eńbek – tarazy degenge saıady. Onyń dáleli, Úkimet Joldaýdy iske asyrýdyń jalpyulttyq josparyn daıyndap, bekitkendigi.
«Durys qanattanǵan túzý ushar» demekshi, Prezıdent qoǵamnyń barlyq salasynda atqarylatyn jumystardyń tabysty bolýynyń birden-bir sharty quqyq ústemdigi qaǵıdasy ekenin basyp aıtty.
Adamdardyń turmys sapasyn anyqtaıtyn ólshemsharttyń biri – qaýipsizdik, adamdardyń eshteńege alańdamaı ómir súretin ortany qurý. Sondyqtan qoǵamdyq tártipti qamtamasyz etetin, quqyq buzýshylyqtar profılaktıkasy, jol júrý qaýipsizdigi jáne t.b. qyzmettermen aınalysatyn ishki ister organdary qyzmetine, polısııa quzyryna qatysty naqty tapsyrma berildi. Osy tapsyrmany oryndaý maqsatynda Úkimet pen Prezıdent Əkimshiligimen birlesip, «Ishki ister organdaryn jańǵyrtý jónindegi jol kartasyn» qabyldap, reformalar 2019 jyldyń 1 qańtarynan bastap júzege asyrylatyn bolady.
Polısııanyń jumysyn servıstik modelge kóshirý arqyly polısııa jumysynyń túbegeıli jaqsartý talaby qoıyldy. Polısııany ózine tıesili emes fýnksııalardan bosatyp, quzyrlaryn naqtylap, jańa sıpattaǵy polıseılerdiń jalaqysyn kóbeıtip, olardyń turǵyn úı jáne ózge de áleýmettik máselelerin sheship, tek úzdikteri ǵana qyzmetin jalǵastyratyndaı reforma jasaý qajettiligi jáne t.b. máseleler aıtyldy.
Árıne kásibı deńgeıi joǵary mamandar qoǵamdyq tártipti baqylap, halyqqa joǵary yntamen qyzmet kórsetse, kúndelikti monıtorıng jasalyp quqyq buzýshylyq oryn alatyn nysandar qatań baqylaýda bolsa, halyqtyń polıseılerge degen senimi jáne qurmeti arta túsetini sózsiz!
Sonymen qosa sot óndirisiniń zamanaýı formattaryn jáne ozyq elektrondy servıster arqyly júrgizilýin qamtamasyz etý qajettiligi talap etildi. Memleket basshysy Sot bıliginiń táýelsiz ekendigin eskere otyryp, kadrlarynyń jańarýyn qamtamasyz etýdi, úzdik zańgerler sýdıa bolýǵa umtylatyndaı jaǵdaı jasaý kerektigin erekshe atap ótti. Joldaýda qoıylǵan tapsyrmany iske asyrý maqsatynda Úkimet, Joǵary Sot Keńesi jáne Joǵarǵy sot birlese otyryp sýdıalyq qyzmetke úmitker sýdıalardy, sot tóraǵalaryn irikteý prosedýrasyn jetildirýdi kózdep otyr.
Únzıla ShAPAQ,
Konstıtýsııalyq
Keńes múshesi, zań ǵylymdarynyń doktory