Qostanaı oblysynyń mádenıet basqarmasynyń qoldaýymen Qostanaı oblystyq tarıhı-ólketaný mýzeıi Ahmet Baıtursynov atyndaǵy QMÝ-niń arheologııalyq zerthanasy mamandarymen birlesip, Torǵaı geoglıfterine zertteý jumystaryn júrgizgen bolatyn. Osy aýqymdy isiń qorytyndysy retinde «Torǵaıdyń ǵuryptyq-qasıetti geometrııalyq keshenderi» kitaby jaryqqa shyqty.
Atalǵan basylymda Torǵaıdyń jer ústindegi eń jumbaq jáne ǵajaıyp qurylystary týraly kóp jylǵy zertteý materıaldary jarııalanǵan. Ondaǵan jyldar boıy kosmotúsirilim kómegimen zerttep, grek tilinen aýdarǵanda jer betine bederli tásilmen jasalǵan sýret maǵynasyn bildiretin 95 geoglıfter tabylǵan. Atalǵan shyǵarylymda 69 nysan zerttelip, usynylǵan.
«Torǵaı geoglıfteri týraly qazir kóp aıtylyp, kóp jazylyp júr. Alaıda onyń barlyǵy da tanymdyq turǵyda. Kitapta osy tabylǵan geoglıfterge barynsha ǵylymı, kásibı turǵydan kelýge umtyldyq. Olardyń kosmostan túsirilgen sýretteri berildi», deıdi mýzeı dırektorynyń orynbasary Galına Satalkına.
Bir qyzyǵy, kitapta bul Torǵaı syzyqtary týraly aqparat 1909 jyly 9 qazanda Orynbor ǵylymı arhıv komıssııasynyń jalpy jınalysynda aıtylǵany týraly tyń derek te kezdesedi.
Názıra Járimbet,
«Egemen Qazaqstan»
Qostanaı