Qazaqstan Respýblıkasy men Aýstrııa Respýblıkasynyń arasynda óńiraralyq baılanys ornatý jáne qarym-qatynasty odan ári damytý maqsatynda Tómengi Aýstrııa federaldy jeriniń ákimshilik ortalyǵy – Sankt-Pıolten qalasynda Qazaqstan Respýblıkasynyń Qurmetti konsýldyǵynyń saltanatty ashylý rásimi ótti.
Oǵan óńirdiń bılik, isker jáne mádenı toptardyń, konsýldyq korpýs jáne buqaralyq aqparat quraldarynyń ókilderi qatysty. Qazaqstan Respýblıkasynyń Aýstrııa Respýblıkasyndaǵy elshisi Qaırat Sarybaı óz sózinde Qurmetti konsýldyqtyń ashylýy ekijaqty qarym-qatynastardyń odan ári damýyna septigin tıgizetinin atap ótti.
Qazaqstan tarapy elimiz ekonomıkasynyń dıversıfıkasııasy aıasynda Tómengi Aýstrııamen yqpaldastyqty tereńdetýge múddeligin tanyta otyryp, bul óńir óziniń aǵash óńdeý, munaı-gaz, toqyma, tamaq ónerkásibi jáne jańǵyrmaly energııa kózderin qoldanýymen tanymal bolyp otyrǵany týraly aıtyldy. Osyǵan oraı, elshi aýstrııalyq tarapty ózara yqpaldastyqtyń ártúrli salalaryndaǵy áleýetti barynsha belsendi damytýǵa shaqyrdy.
Sonymen birge Q.Sarybaı jańa Qurmetti konsýl Aleksandr Kısske Qazaqstannyń konsýldyq patenti men Qazaqstan Respýblıkasynyń Týyn tabys ete otyryp, Qazaqstan-Aýstrııa yntymaqtastyǵyn keńeıtý jolynda sáttilik tiledi.
Aýstrııanyń «ÖWD Wachdienst security GmbH & Co KG» kompanııasynyń dırektory Aleksandr Kıss Tómengi Aýstrııa federaldy jerinde Qazaqstannyń múddesin qorǵaý boıynsha joǵary senim artqany úshin alǵys bildirip, eki el ıgiligi úshin óziniń tájirıbesi men bilimin jumsaıtynyn atap ótti.
Sonymen qatar Qurmetti konsýldyqtyń ashylýyna oraı Qazaqstannyń Aýstrııadaǵy elshiligi tarapynan júrgizilip jatqan «Qazaq injýleri – Uly Dala caryny» jobasy sheńberinde jas mýzykanttar Álııa Aqbergenova men Nıkolaı Orınınskııdiń qatysýymen konsert uıymdastyryldy.
«Egemen-aqparat»