Mundaǵy basty maqsat jastardy jaǵymdy moraldyq qasıetterge, sonyń ishinde ishki parasattylyq pen adaldyqqa shaqyrý. Áýeli bul faktorlar jas býynnyń sybaılas jemqorlyqqa qarsy ımmýnıtetin kúsheıtýge tikeleı áser etedi.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen qolǵa alynǵan joba - «Adaldyq dúkeni» dep atalady. Atalǵan bastamany eń alǵash Agenttiktiń Shymkent qalasy boıynsha departamenti qaladaǵy barlyq joǵarǵy oqý oryndary men kolledjderde ashý týraly usynys aıtqan.
Jaqsy bastamaǵa M.Áýezov atyndaǵy Ońtústik Qazaqstan memlekettik ýnıversıteti alǵashqylardyń biri bolyp qoldaý bildirdi. Kúni keshe Departament basshylyǵy Darııa Qojamjarova basqaratyn ýnıversıtet ujymymen birlese saltanatty túrde ashylý rásimin ótkizdi.
«Adaldyq dúkeniniń» jumysy ózine-ózi qyzmet kórsetý júıesi boıynsha júrgiziledi. Bir qyzyǵy, munda oqytýshylar men stýdentter ózderine qajetti zattardy alyp, alynǵan taýar úshin aqshany kassa jáshigine qaldyryp, esep aıyrysady. Bir sózben, dúkende satýshy joq. Zat satyp alýshylar óz-ózderine qyzmet etedi.
Ashylý saltanatynda Departamenttiń Sybaılas jemqorlyq profılaktıkasy basqarmasynyń basshysy Erǵalı Jumabaev QR Memlekettik qyzmet isteri jáne sybaılas jemqorlyqqa qarsy is-qımyl agenttigi Tóraǵasynyń bastamasymen júzege asqan jobany Shymkent qalasynda alǵash bolyp qoldaǵan Ýnıversıtetke alǵysyn bildirdi.
Sóz kezeginde Erǵalı Tilesbaıuly «Jobanyń basty maqsaty - qoǵamda senim atmosferasyn birtindep qurý jáne stýdent jastarǵa ózin jaqsy, adal adam retinde anyqtaýǵa múmkindik berý», dedi.
Shymkenttik stýdentter mundaı dúkenniń ashylýyna tańdanystaryn jetkizip, jastarǵa senim bildirgen uıymdastyrýshylarǵa, ýnıversıtet ujymyna rızashylyqtaryn jetkizdi.
Shahardaǵy irgeli oqý ordasynda ashylǵan «Adaldyq dúkeni» kelesi kezekte qalanyń barlyq joǵarǵy, orta, arnaýy oqý oryndarynda ashylatyn bolady.
Nurshat TО́KEN,
«Egemen Qazaqstan»
ShYMKENT