Oral qalasynda bir top memlekettik qyzmetshi H.Bókeeva atyndaǵy Batys Qazaqstan oblystyq qazaq drama teatrynda «Qudalar» dramasyn tamashalady.
Bir qyzyǵy bul sharany Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Batys Qazaqstan oblysy boıynsha departamenti uıymdastyryp otyr. «О́ıtkeni M.Baıdjıevtiń qalamynan shyqqan bul qoıylym sıýjeti qoǵamda sybaılas jemqorlyqqa qarsy mádenıetti qalyptastyrýǵa jáne zań sheńberinde ǵana emes, moraldi turǵyda jemqorlyqtyń shynaıy kelbetin ashýǵa baǵyttalǵan» deıdi departament basshysy, Ádep jónindegi keńes tóraǵasy B.Isaqov. Sondyqtan da qoıylym aldynda Bolat Isaqov Elbasynyń «Rýhanı jańǵyrý» baǵdarlamasyn iske asyrý sheńberinde Agenttik júzege asyryp jatqan «О́zgeristerdi ózińnen basta» kishi baǵdarlamasynyń jáne «Uly dalanyń jeti qyry» atty maqalasynyń mańyzdylyǵy jaıly aıtyp, memlekettik qyzmetshilerdi mádenı is-sharalarǵa belsendi qatysýǵa shaqyrdy.
Kúlkisi men kúıinishi qatar túsip jatatyn qoıylymda ómirdegi oqıǵalar kórinis tapqan. Qarapaıym mektep muǵalimi Kúrishbek úlgerimi nashar oqýshyǵa kóterińki baǵa qoıý úshin para alýdan bas tartsa, spektakldiń fınalynda adal ustazǵa onyń eń jaqyn jandary, otbasy qarsy shyǵyp, qylmysqa tartpaq bolady. Qazirgi qazaq qoǵamynda sybaılas jemqorlyqqa qarsy shyǵý, onymen kúresý qıyndyǵy shynaıy kórsetilgen. Osy qoıylymǵa arnaıy shaqyrylǵan memlekettik organdardyń, quqyq qorǵaý júıesiniń qyzmetkerleri, muǵalimder men dárigerler teatrdan tyń oı túıip ketkeni anyq.
«Biz memlekettik qyzmetkerlerdi qoǵam dertin áshkereleıtin osyndaı spektaklderge shaqyrý arqyly qoǵamda sybaılas jemqorlyqqa qarsy mádenıetti qalyptastyrýǵa yqpal etemiz. Sybaılas jemqorlyqqa qoǵam bolyp qarsy turý - birlik pen turaqtylyqtyń kepili bolmaq» deıdi sharany uıymdastyrýshylar.
Qazbek QUTTYMURATULY,
«Egemen Qazaqstan»