Elordada Azamattyq qoǵammen ózara is-qımyl boıynsha ýákilderge arnalǵan dıalog alańy ótip jatyr. Elimizdiń ár aımaǵynan kelgen delegattar forýmǵa qatysty pikirlerin bildirdi.
Marat Júnis-Bek, Respýblıkalyq «Chernobyl ardagerleri jáne múgedekteri» qoǵamdyq birlestikteriniń úılestirý keńesiniń birinshi tóraǵa orynbasary (Astana qalasynan):
Búgingi Azamattyq forým múmkindigi shekteýli ár túrli jastaǵy azamattar, áleýmettik qorǵaýdy qajet etetin múgedekter jáne jastar úshin úlken qoldaý bolǵaly tur. Elbasy aıtqandaı, búgingi qoǵam úshin kedergisiz bolashaq kerek. Memlekettik emes uıymdardyń ókilderimen baılanysty qalyptastyrý jáne jandandyrý jumystary jıi bolǵan saıyn azamattyq qoǵamymyzdyń áleýeti jaqsara túsedi. Búgingi forýmnan keıin qatysýshylardyń júrekterinde úlken bir jalyn paıda bolady. Sanaýly adamdar ǵana ár óńirdegi sharalarǵa qatysa alady. Al búgingi forým barlyq aımaqtyń ókilderiniń basyn qosty. Bul forým arqyly bolashaqtaǵy jumys josparlarymyzdy jańasha túrlendirýdiń múmkindigi týdy. Eń bastysy búgingi forýmda múmkindigi shekteýli adamdardyń bizben teń ekendigin kórsete aldyq. 32 myńnan astam Chernobyl apparatyna qatysqan qazaqstandyq bolsa, búginde olardyń 5 myńǵa jýyǵy ǵana qaldy. Biz beıbit kúnde adamdardan aıyrylyp jatyrmyz. Biz osy forýmnan tájirıbe ala otyryp, Chernobyldyqtardyń jumysyn ózgertýge baǵyt-baǵdar alamyz degen úmittemin. Forýmnan alǵan jańa baǵyttardy óńirlerde júzege asyramyz dep oılaımyz.
Sabıra Baızaqova, «Jalyn» jastar uıymy qoǵamdyq birlestiginiń jetekshisi. (Shymkent qalasynan):
Azamattyq forýmǵa birinshi ret qatysýym. Azamattyq sektordaǵy eńbek ótilimim 8 jyl. Bul forýmnan kóptegen qoǵamdyq uıymdar ózindik bir anyqtamalar alady degen oıdamyn. Bul forýmda memlekettik baǵdarlamalar, tujyrymdamalar, belgili bir jumystyń prosesin jolǵa qoıatyndaı jaqsy sheshimder qabyldanady. Mysaly «Jumyspen qamtý-2020» baǵdarlamasy osy Azamattyq forýmnyń birinde uıymdardardyń atynan bastama bolyp kóterilgen. Ol baǵdarlama qazir jaqsy nátıje berip jatyr. Dál sol sekildi aldaǵy 10 jyldyqqa tıesili nemese 5 jyldyqqa tıesili uzaq merzimdi, qysqa merzimdi degen sekildi bir jaqsy bastamanyń kýágeri bolatynyma senimdimin. Men Shymkent qalasynda tirkelgen «Jalyn» jastar uıymy atynan kelip otyrmyn. Azamattyq forýmǵa jalpy Shymkent qalasynan 25 delegat keldi. Odan bólek respýblıkalyq «Tanym» júldesine qatysqan arnaıy úkimettik emes uıymdar bar. Olardyń arasynda eki úkimettik emes «Intellekt» jáne «Dárııa» qoǵamdyq uıymdary bizdiń qalanyń atynan shyǵyp otyr. Áriptesterimniń bastamasyna óte qýanyshtymyn. Mundaı azamattyq oıy bar adamdar qoǵamnan árqashan oryn tabady degen oıdamyn. Osy forýmda Qazaqstandaǵy jastar uıymdarynyń jumysy jandansa eken deımin. Aımaqtarmen baılanysty kúsheıtsek eken nemese aımaq-aımaq bolyp júıeli jumystar júrgizýdi qolǵa alsaq eken.
Kúlásh Shakırova, Ońtústik Qazaqstan musylman áıelderi «Bıbi Fatıma» qoǵamdyq birlestiginiń tóraıymy (Túrkistan oblysynan):
Biz qazaq qyzdarynyń ulttyq tárbıesin jandandyryp, áıel quqyqtaryn qorǵaýǵa arnalǵan jumystar atqaramyz. Qyz balalar men áıelder qaýymynyń turmystyq jaǵdaıdaǵy qıyndyqtary áli de kezdesedi. Biz musylman áıelderiniń birlestigi aýdandardy aralap qyz-kelinshektermen kóptegen kezdesýler uıystastyryp júrmiz. Mektep jasyndaǵy qyzdardyń sanasyna qazaqy tárbıe men ulttyq salt-dástúrdiń ozyǵyn oıǵa salyp otyramyz. Búgingi forým barysynda ózge de kóptegen qoǵamdyq birlestikterdiń ókilderimen aýqymdy dıalog alańynda birqatar másele kóteremiz. Forým barysynda tanystyrylatyn tujyrymdama negizinde ár azamat úshin oń sheshim qabyldanady dep oılaımyz.
Farhat Qatyrenov, «TIFLOSMART múgedekter qoǵamy» qoǵamdyq birlestiginiń jetekshisi (Astana qalasynan):
«Tiflosmart» múgedekter qoǵamyn ashqanymyzǵa 1 jyldan asty. Bizdiń basty mindetimiz kózi nashar kóretin adamdarǵa tıflotehnıkalyq quraldar arqyly sabaq berý. Sondaı-aq biz kórý múmkindigi shekteýli azamattardyń quqyqtaryn qorǵaýmen, olarǵa moraldyq jaǵynan qoldaý kórsetýmen aınalysamyz. Tıflotehnıka degenimiz telefon, smartfondar kómegimen dybystyq súıemeldeý arqyly arnaıy dárister júrgizý. Bul joba aıasynda búginge deıin 60 adam oqýdan ótti. Osy forým barysynda ózimizge qajet kóptegen aqparattar alamyz degen oıdamyz. Múgedekterdiń jaǵdaıyn jasaýǵa arnalǵan baǵdarlamalardyń kóptigi qýantady.
Daıyndaǵan:
Marjan TILEÝBEK,
«Egemen Qazaqstan»