Aqtóbe aımaǵynda Tuńǵysh Prezıdent kúni qarsańynda osy mereıli data qurmetine «Aýyl – el besigi» forýmy ótkizildi. Ári osy baǵytta qolǵa alynǵan óńirlik jobanyń júrgizilý barysyna jan-jaqty taldaýlar jasalyp, onyń keıbir alǵashqy nátıjeleri márege jetti. Osy oraıda tutastaı respýblıkamyzdaǵy jáne óńirdegi bıznes pen memlekettik qurylymdardyń ókilderi Alǵa aýdanyndaǵy Amangeldi aýylynda bas qosyp mesenattyqty aýyldardy qoldaý qural retinde damytý máselelerin talqylady.
Olardyń arasynda «Atameken» UKP basqarmasy tóraǵasynyń orynbasary Eldar Jumaǵazıev, kásipker mesenattar Islambek Saljanov pen Jaqsylyq Úshkempirov, «Meniń atamekenim» qoǵamdyq birlestiginiń atqarýshy dırektory Lıazzat Shyńǵysbaevalardyń bolǵany forým aıasy men aýqymyn keńeıte túskeni anyq.
Buǵan deıin qazaq baspasózine «Qaıdasyńdar qazaqtyń mesenattary?» degen taqyryp jıi qozǵalatyn. Búgingi kún bıiginen kóz salǵanda bulaısha joqtaý salýdyń reti joq sekildi. Iаǵnı qazirgi kúni el men jerge jan ashıtyn el-jurtynyń aldyndaǵy qaryzdary men paryzdaryn umytpaıtyn kásipker-mesenattar qatary birshama kóbeıip keledi. Sondaı-aq keıingi kezde elimizde mesenattyq pen qaıyrymdylyq dástúrlerin yntalandyrý sharalary da oń jolǵa qoıylǵan. Ári búginde mesenattyqty engizý tetikteri de bir júıege túsip keledi. Amangeldi aýylynda ótkizilgen «Aýyl – el besigi» forýmy alǵa qoıǵan basty maqsattyń biri de osy desek oǵan qatysýshylar atalǵan údeniń bıiginen shyǵa bildi dep senimmen aıtýǵa bolady. Memleket basshysy bıylǵy Qazaqstan halqyna Joldaýynda aýyl turǵyndaryn jappaı kásipkerlik iske daǵdylandyrý, qajet jaǵdaıda arnaıy kýrstar ashyp oqytý jóninde másele qoıǵany belgili. Forým qyzmeti bul oraıda da nátıjeli bolǵany anyq. О́ıtkeni mártebeli jıynda basqosqandar bul máselege qatysty da ózekti áńgimeler órbitti.
Respýblıka Prezıdenti belgilep bergen «Aýyl – el besigi» jobasy tar óristilikten ada, jan-jaqty keshendi ári kókjıegi keń uǵym. Buǵan aýyldyq aýmaqtardyń ınfraqurylymyn odan ári jetildirý, aýyldaǵy mektep, dárigerlik ambýlatorııalar, áleýmettik-turmystyq nysandar men mádenıet oshaqtary ǵımarattyn jańǵyrtý máseleleri de osy jobanyń bel ortasynan oıyp turyn oryn alady.
Osy oraıda «Aýyl - el besigi» oblystyq forýmy aıasynda Amangeldi aýylynda demalys ortalyǵynyń ashylýy, Qarabulaq aýylyndaǵy mektep ǵımaratyn ákimshilik jáne mektep ǵımaraty etip qaıta jasaqtaý jumystary júrgizilgeni de is pen nátıjeniń úılesimin kórsetedi. Munyń mánisi mynada Qarabulaq mektep-balabaqshasyn ońtaılandyrý barysynda mektep ǵımaraty bir qabatynyń sol jaq bóligine ákimshilik qonys tepse, ekinshi bóligine aýyldyq klýb pen kitaphana qonys tepti. Aýyldardy jańǵyrtý jumystary tek munymen shektelmeıdi. Sonymen birge Prezıdent kúni qarsańynda Tańdy aýylyndaǵy ambýlatorııaǵa kúrdeli jóndeý jumystary da márege taıady. Taǵy bir aıta keterlik másele bul jumystar aýyl azamattarynyń óz qarajattary arqyly tyndyrylǵan.
Amangeldi aýylynda uıymdastyrylǵan «Aýyl - el besigi» forýmynyń saltanatty túrde ashylý rásimi kezinde Aqtóbe oblysy ákiminiń Berdibek Saparbaev quttyqtaý sóz sóılep, atalǵan forým Tuńǵysh Prezıdent kúnimen tuspa-tus kelip otyrǵanyn atap kórsetti. Bul meıram – álem moıyndaǵan tarıhı tulǵa, Elbasy N.Á.Nazarbaevqa degen óz halqynyń aq nıeti men alǵysy. Sondaı-aq bul mereke ata-babalarymyzdy ǵasyrlar boıy ańsaǵan armanyna jetkizip, abyroıyn asyrǵan eline degen ystyq yqylasy degen túıin jasady. Qazirgi Qazaqstan óndiris pen ekonomıkasy jan-jaqty damyǵan, halqy tatý-tátti, aýyzbirshiligi mol aýqymdy bastamalardyń eli. Búkil álem jurtshylyǵynyń nazaryn ortaq otanymyz Qazaqstanǵa aýdarǵan Elbasymyz naǵyz kóshbasshy dedi budan ári óńir basshysy. Osy oraıda Aqtóbede ótken forým Elbasy usynǵan «Týǵan jer» baǵdarlamasymen úndes ekenin de aıtý paryz. Bul bastamany aqtóbelik azamattar men bıznes ókilderi zor yntamen qoldaǵany taǵy bir mereı. Búgingi kúni mundaǵy ár aýdan men aýylda osy topyraqta dúnıege kelgen perzentterdiń kómegi men aýyl ajary jyldan jylǵa ashylyp keledi.
Oblysta aýyl qamqorshylarynyń qatysýymen jyl sońyna deıin «Týǵan jerge taǵzym» aksııasy aıasynda úsh mıllıardtan astam teńgege 786 joba júzege asyrylmaq. Onyń ishinde quny eki mıllıard teńgeden asatyn 666 joba qazirdiń ózinde iske asyp úlgerdi. Atap aıtqanda jańa áleýemettik nysandar salynyp joldar men kópirler jóndeldi. Eldimekender abattandyryldy. Bilim berý nysandarynyń materıaldyq-tehnıkalyq bazasy óse tústi. Sonymen bir mezgilde qaıyrymdylyq sharalar da qosa ótkizilip keledi. О́ńirde sondaı-aq «Aýyl - el besigi» jobasynyń bir bóligi – «Ár aýylǵa bir qamqorshy» aksııasy da belsendi túrde qoldaý tapty. Qazirgi tańda osy aksııa aıasynda quny eki mıllıard teńge turatyn 344 joba júzege asyryldy. Taıaý ýaqytta taǵy da 323 kásipkerdiń qoldaýymen 218 eldi mekende quny eki mıllıard teńgeden asatyn 322 joba júzege asyrylmaq.
Aqtóbeli azamattar «Aýyl - el besigi» jobasyn jasaqtaýǵa baılanysty bir kún ishinde jarty mıllıard teńgeden astam qarajat jınaǵany da atap aıtýǵa turarlyqtaı. Forým aıasynda Aqtóbe qalasynda jáne oblystyń barlyq aýdandarynda áleýmettik mańyzy joǵary jobalardy júzege asyrý týraly kelisimge qol qoıyldy. Sondaı-aq óńirde elimizde balamasy joq buǵan deıin qolǵa alynǵan «Aýyl qamqorshysy» jobasynyń aýqymyn odan ári kóterý týraly qarar qabyldandy.
Temir Qusaıyn,
«Egemen Qazaqstan»
Aqtóbe