Kókshetaýdaǵy aqyn keshi

Kókshe topyraǵynan túlep ushyp, qazaq ádebıetiniń beldi bir ókiline aı­nalǵan shyǵarmashylyq ıesiniń keshine qalamgerdiń talantyn qur­metteıtin, sóz ónerin syılaıtyn adam­dar kóp jınaldy. Aqynnyń ózi týyp-ósken Zerendi aýdanynyń Kók­terek aýylynan kelgen aýyldas­tary, zııaly qaýym ókilderi, jer­gilikti aqyn-jazýshylar, jastar, taǵy basqa da qoǵamdyq jurt­shylyq ókil­deriniń esimi elimizge keńi­nen ta­nymal qalamgermen osyndaı bir jyly shyraıly júzdesýdi saǵynyp qalǵandyǵy kezdesý barysynan jaqsy kórinip turdy.      

Aldymen belgili aqyn Tólegen Qajybaı, el aǵasy Aıdos Ábýtá­lipovter qalamgerdiń shyǵar­mashy­lyǵyna tereńirek toqtalsa, eńbek jo­­lyn birge bastaǵan belgili jazýshy, aýdarmashy Ǵosman Tóleǵul san qyrly talant ıesiniń jýrnalıstik qabilet-qarymyn jiktep aıtyp berdi. Qalamgerdiń kýrstasy, qa­zaq­tyń bel­gili jazýshysy Marat Májıtovtiń sonaý stýdenttik ke­zeń­­nen bastap sóz ónerine qumart­qan Qorǵanbek aqynnyń ishki jan-dú­nıesin, azamattyq beınesin aı­shyq­tap aıtýy, ádemi shyqty.   

Aqynnyń jyldar boıy júregin jaryp shyqqan syrǵa toly sulý jyrlary toptastyrylǵan elektrondy jınaqtyń tusaýkeseri ótkizildi. Ájeler shashý shashty, aqsaqaldar aq batasyn berdi. Jalyndy jyrlar oqyl­dy, óleń sózdiń patshasynyń ús­temdik quryp, baǵyn jandyrý joly jaıynda el aǵasy Bolat Kó­shim­baev­­­tyń túıindi pikiri kóp kóńilinen shyqty. Sózdiń quny bóz­diń qunynan tómendegen zaman­da jańa dáýirdiń adamdarynyń kóki­regin tirshiliktiń shań-tozańynan ta­zalap, tańǵy shyqtaı móldiretýi qı­sapsyz áser etetin óleń ólkesiniń órisin keńeıtýdiń joly arnaıy qor qurý dedi ol. Bul eń aldymen, aqyn­darǵa ǵana emes, aqynnyń almas qylyshtaı jarqyldaǵan sózi men muńyn seıiltip, armanyna qanat qaqtyratyn Alashtyń ózine kerek. 

Kezdesý keshinde Qorǵanbek Aman­­jol alqalaǵan áleýmetke aq­ al­ǵysyn joldap, sońǵy kezde jaz­ǵan óleńderin oqyp berdi. Qara­shanyń sońǵy kúnderi sýyq aýa býǵan Kóksheniń kógildir as­panyn býy burqyraǵan tamasha jyrlar jylytyp, jadyratqandaı.

Baıqal BAIÁDIL, «Egemen Qazaqstan»