15-16 jeltoqsan kúnderi Gýanchjoýda (Qytaı) dzıýdodan jyldyń eń sońǵy álemdik «Masters» týrnıri ótedi. Atalǵan báseke mańyzdylyǵy jaǵynan Olımpııa oıyndary men álem chempıonatynan keıingi orynda turady.
Dodaǵa ár salmaq boıynsha álem reıtıngindegi úzdik 16 dzıýdoshy ǵana qatysa alady. Týrnırde tabysty óner kórsetken sportshylar úshin reıtıngtegi upaı sanyn eseleýge tamasha múmkindik týyndaıdy. Bas júldeni oljalaǵan dzıýdoshyǵa 1 800 upaı berilse, fınalda beldeskender 1 250 upaı oljalaıdy. Úshinshi orynǵa ıe bolǵan dzıýdoshynyń reıtıngine 900 upaı qosylady.
Jarys erejesine saı álem reıtınginde ár salmaq boıynsha úzdik 16 sportshy qataryna Qazaqstan ulttyq quramasynan 7 dzıýdoshy enip, «Masters» týrnırine qatysýǵa múmkindik aldy. Olar: 60 kg – Ǵusman Qyrǵyzbaev – 7-oryn (3881 upaı) pen Eldos Smetov – 13 (2765). 66 kılo – Erlan Serikjanov – 10 (3 200) pen Eldos Jumaqanov – 11 (3 067). 73 kılo – Jansaı Smaǵulov – 10 (3 044). 81 kılo – Dıdar Hamza – 15 (2 446) jáne 90 kılo – Islam Bozbaev – 15 (2 718 ).
Álı BITО́RE,
«Egemen Qazaqstan»